ye Khaal-o-KHad mere apne

har ek jism mirā hai, har ek jaan mirī

ye ḳhāl-o-ḳhad mire apne, ye ān-bān mirī

sitam to ye hai ki mazlūm maiñ huuñ zālim maiñ

har ek zaḳhm mujhī se hisāb māñgegā

har ek daaġh mirī āstīñ se jhāñkegā

hazār-hā mirī peshāniyoñ ke chāñd bujhe

hazār-hā mire lab ham-kanār-e-zahr hue

hazār-hā mire jismoñ kī Dāliyāñ TūTīñ

hazār-hā mirī āñkhoñ kī mish.aleñ Dūbīñ

jahāñ pe aag lagī hai, vahāñ khilaune the

jahāñ pe ḳhaak uḌī hai, vahāñ pe jhūle the

jahāñ pe sard haiñ siine vahāñ pe chaukhaT thī

jahāñ pe band haiñ āñkheñ vahāñ darīche the

maiñ is dhueñ meñ kahāñ apnī laash ko DhūñDūñ

maiñ is hujūm meñ kaise shumār-e-zaḳhm karūñ

sitam to ye hai ki mazlūm maiñ huuñ, zālim maiñ

har ek zaḳhm mujhī se hisāb māñgegā!

har ek daaġh mirī āstīñ se jhāñkegā

har ek jism mera hai, har ek jaan meri

ye KHal-o-KHad mere apne, ye aan-ban meri

sitam to ye hai ki mazlum main hun zalim main

har ek zaKHm mujhi se hisab mangega

har ek dagh meri aastin se jhankega

hazar-ha meri peshaniyon ke chand bujhe

hazar-ha mere lab ham-kanar-e-zahr hue

hazar-ha mere jismon ki Daliyan TuTin

hazar-ha meri aankhon ki mishalen Dubin

jahan pe aag lagi hai, wahan khilaune the

jahan pe KHak uDi hai, wahan pe jhule the

jahan pe sard hain sine wahan pe chaukhaT thi

jahan pe band hain aankhen wahan dariche the

main is dhuen mein kahan apni lash ko DhunDun

main is hujum mein kaise shumar-e-zaKHm karun

sitam to ye hai ki mazlum main hun, zalim main

har ek zaKHm mujhi se hisab mangega!

har ek dagh meri aastin se jhankega