ye lagta hai ki tum aae

jab sāl-e-ravāñ dhuum machātā huā aa jaa.e

aañsū se munavvar yahāñ har gosha nazar aa.e

aamad pe na.e saal kī jab kahkashāñ bujh jaa.e

aise meñ har aahaT pe ye lagtā hai ki tum aa.e

sumbul kī lachaktī huī zulfoñ se kare chheḌ

jhoñkā koī āmāda sharārat pe nazar aa.e

yā bād-e-sabā phuul ke ruḳhsāroñ ko chhū jaa.e

aise meñ har aahaT pe ye lagtā hai ki tum aa.e

mahtāb kā chehra kisī chilman kī liye oT

raushan kabhī maddham kabhī jab khel meñ lag jaa.e

jab niilā gagan aartī tāroñ se sajā laa.e

aise meñ har aahaT pe ye lagtā hai ki tum aa.e

sāhil ke laboñ ko kabhī chhūne ke liye aa.e

chanchal sī koī lahr jo āġhosh meñ kho jaa.e

sāñsoñ kī harārat agar sāñsoñ meñ samā jaa.e

aise meñ har aahaT pe ye lagtā hai ki tum aa.e

jab chāñd kī jānib kare parvāz chakorī

yā koī papīhā pihū-pīhū kahīñ chillā.e

jab chāñdnī lahroñ pe kabhī diip jalā jaa.e

aise meñ har aahaT pe ye lagtā hai ki tum aa.e

tanhā.ī meñ yādeñ kabhī jab DhūñDhtī aa.eñ

vo shāmeñ jo ab palkeñ bhigotī huī jaa.eñ

bārāt ga.e lamhoñ kī jab raat meñ aa jaa.e

aise meñ har aahaT pe ye lagtā hai ki tum aa.e

jab sal-e-rawan dhum machata hua aa jae

aansu se munawwar yahan har gosha nazar aae

aamad pe nae sal ki jab kahkashan bujh jae

aise mein har aahaT pe ye lagta hai ki tum aae

sumbul ki lachakti hui zulfon se kare chheD

jhonka koi aamada shararat pe nazar aae

ya baad-e-saba phul ke ruKHsaron ko chhu jae

aise mein har aahaT pe ye lagta hai ki tum aae

mahtab ka chehra kisi chilman ki liye oT

raushan kabhi maddham kabhi jab khel mein lag jae

jab nila gagan aarti taron se saja lae

aise mein har aahaT pe ye lagta hai ki tum aae

sahil ke labon ko kabhi chhune ke liye aae

chanchal si koi lahr jo aaghosh mein kho jae

sanson ki hararat agar sanson mein sama jae

aise mein har aahaT pe ye lagta hai ki tum aae

jab chand ki jaanib kare parwaz chakori

ya koi papiha pihu-pihu kahin chillae

jab chandni lahron pe kabhi dip jala jae

aise mein har aahaT pe ye lagta hai ki tum aae

tanhai mein yaaden kabhi jab DhunDhti aaen

wo shamen jo ab palken bhigoti hui jaen

baraat gae lamhon ki jab raat mein aa jae

aise mein har aahaT pe ye lagta hai ki tum aae