ye log

us shaam kī rañgīnī se jo baat chalī hai

shab bhar vo mirī fikr ko sahlātī rahī thī

jo log vahāñ aa.e the sab shoḳh-o-javāñ the

har baat pe hañste the uchhal paḌte the ik dam

kitne hī mazāmīn dimāġhoñ ne navāze

kuchh husn kī kuchh ishq kī kuchh ḳhvāb kī bāteñ

mahbūb kī āñkhoñ meñ utar jaane ke armāñ

saaqī kī adāoñ se lipaTne kī umañgeñ

hoñToñ pe koī aah kisī yād-e-hasīñ kī

kuchh rañg-e-siyāsat pe lab-e-fikr kī rahmat

logoñ ke zamāne ke kitāboñ ke fasāne

ummīd kī palkoñ pe kisī shikve ke aañsū

sīnoñ kī kisī talḳhī-e-be-nām ke lab par

āḳhir meñ kisī jang kī afsurda hikāyat

mahfil kī tamāzat meñ baḌe naaz se baiThe

ye log kisī zulf ko suljhāte rahe the

ik maiñ bhī thā ḳhāmosh pareshān vahāñ par

har lamha mirī nazroñ ne mahfil ko TaTolā

shāyad kahīñ mil jaa.e koī nanhā sharāra

ik nuqta jahāñ ruktī haiñ maqsad kī nigāheñ

ye log mire dost masarrat ke bhikārī

bātoñ ke sivā in meñ koī baat nahīñ thī

us sham ki rangini se jo baat chali hai

shab bhar wo meri fikr ko sahlati rahi thi

jo log wahan aae the sab shoKH-o-jawan the

har baat pe hanste the uchhal paDte the ek dam

kitne hi mazamin dimaghon ne nawaze

kuchh husn ki kuchh ishq ki kuchh KHwab ki baaten

mahbub ki aankhon mein utar jaane ke arman

saqi ki adaon se lipaTne ki umangen

honTon pe koi aah kisi yaad-e-hasin ki

kuchh rang-e-siyasat pe lab-e-fikr ki rahmat

logon ke zamane ke kitabon ke fasane

ummid ki palkon pe kisi shikwe ke aansu

sinon ki kisi talKHi-e-be-nam ke lab par

aaKHir mein kisi jang ki afsurda hikayat

mahfil ki tamazat mein baDe naz se baiThe

ye log kisi zulf ko suljhate rahe the

ek main bhi tha KHamosh pareshan wahan par

har lamha meri nazron ne mahfil ko TaTola

shayad kahin mil jae koi nanha sharara

ek nuqta jahan rukti hain maqsad ki nigahen

ye log mere dost masarrat ke bhikari

baaton ke siwa in mein koi baat nahin thi