ye sal achchha hai

barf aur bārūd ke burāde meñ

ThiThurtī sulagtī shab

tumhāre aane kī ḳhushbū

chahār samtoñ meñ

har ek ummīd kā āñgan

sadā.eñ detā hai

ḳhamīda ḳhvāb hamāre bhī sar uThā ke chaleñ

nigāheñ naaz kareñ

hurūf lab se jo nikleñ to deñ payām-e-masīh

hamārī samtoñ ko amn-o-amāñ mayassar ho

chamakte chāñd kā tesha fasīl-e-shab kaaTe

to jū-e-shīr aa.e

isī liye mire chāroñ taraf charāġhāñ hai

ki tum jo aao dabe paañv to kuchal Daalo

ye maslahat ke mahakte hazār-hā mausam

saḌak pe khelte bachchoñ ko thoḌā bahlāo

dhuup dikhlāo sard rātoñ ko

garm bārūd ko bhī pighlāo

payām-e-marg ke badle mile payām-e-hayāt

mujhe bhī ek barahman ne kahā hai ki ye saal achchhā hai

barf aur barud ke burade mein

ThiThurti sulagti shab

tumhaare aane ki KHushbu

chahaar samton mein

har ek ummid ka aangan

sadaen deta hai

KHamida KHwab hamare bhi sar uTha ke chalen

nigahen naz karen

huruf lab se jo niklen to den payam-e-masih

hamari samton ko amn-o-aman mayassar ho

chamakte chand ka tesha fasil-e-shab kaTe

to ju-e-shir aae

isi liye mere chaaron taraf charaghan hai

ki tum jo aao dabe panw to kuchal Dalo

ye maslahat ke mahakte hazar-ha mausam

saDak pe khelte bachchon ko thoDa bahlao

dhup dikhlao sard raaton ko

garm barud ko bhi pighlao

payam-e-marg ke badle mile payam-e-hayat

mujhe bhi ek barahman ne kaha hai ki ye sal achchha hai