ye sab to

merā koī naam nahīñ

na koī vatan

na maz.hab

na baap na maañ hai koī

yuuñ merā honā

bahutoñ ke nazdīk

mashkūk ho gayā

phir har taraf se thū thū hone lagī

māvarā se

ghasīTte phiro us kī laash

ek saath ka.ī āvāzeñ buland huiiñ

ka.ī muTThiyāñ khiñchīñ

lāThiyāñ chalīñ

talvāreñ sauntī ga.iiñ

bandūqeñ dāġhī ga.iiñ

par saarī talvāreñ

lāThiyāñ aur bandūqoñ kī goliyāñ

kuchh duur havā ko chiir kar

nīche aan girīñ

jis kā koī naam na ho

na vatan

na maz.hab

na koī vaalī vāris

use nishāne par laanā āsān bhī to nahīñ

ye sab kuchh to

har ek meñ chhupā huā hai

kuchh farz kar lenā

haqīqat meñ kuchh honā to nahīñ hai

haañ kisī kī maut farz kī jā saktī hai

kisī bhī lā-vāris qabr par

kisī bhī naam kā katba lagāyā jā saktā hai

sab harāmī bachche

ek ho jaa.eñ

muTThiyāñ bheñch leñ

lāThiyāñ taan leñ

talvāreñ saunt leñ

bandūqeñ uThā leñ

aur shust bhī bāñdh liiñ

to bhī un kā vaar ḳhālī hī jaatā hai

ḳhālī na bhī gayā

to bhī

halākat to ḳhud un kī honī hai

kyūñki

ye sab kuchh to

har ek meñ chhupā huā hai

mera koi nam nahin

na koi watan

na mazhab

na bap na man hai koi

yun mera hona

bahuton ke nazdik

mashkuk ho gaya

phir har taraf se thu thu hone lagi

mawara se

ghasiTte phiro us ki lash

ek sath kai aawazen buland huin

kai muTThiyan khinchin

laThiyan chalin

talwaren saunti gain

banduqen daghi gain

par sari talwaren

laThiyan aur banduqon ki goliyan

kuchh dur hawa ko chir kar

niche aan girin

jis ka koi nam na ho

na watan

na mazhab

na koi wali waris

use nishane par lana aasan bhi to nahin

ye sab kuchh to

har ek mein chhupa hua hai

kuchh farz kar lena

haqiqat mein kuchh hona to nahin hai

han kisi ki maut farz ki ja sakti hai

kisi bhi la-waris qabr par

kisi bhi nam ka katba lagaya ja sakta hai

sab harami bachche

ek ho jaen

muTThiyan bhench len

laThiyan tan len

talwaren saunt len

banduqen uTha len

aur shust bhi bandh lin

to bhi un ka war KHali hi jata hai

KHali na bhi gaya

to bhi

halakat to KHud un ki honi hai

kyunki

ye sab kuchh to

har ek mein chhupa hua hai