ye tamanna abas

use dekhne kī tamannā abas

vo kaisā lagegā

abhī dhundlī dhundlī lakīroñ ne chehra banāyā nahīñ

abhī us kī āvāz bhī resha resha hai

us ne guzartī huī sā.atoñ ko batāyā nahīñ

abhī barf kī tah ke nīche haiñ āñkhoñ kī jhīleñ

abhī jhiil kī machhliyāñ zard sūraj kī kirnoñ se mahrūm haiñ

magar kyā ḳhabar

vo azal se abad tak isī kaifiyat meñ rahe

yā mirī aañkh us kī badaltī huī rañgtoñ se shanāsā na ho

maiñ use kyuuñ adhūrā kahūñ

merī āñkheñ hī shāyad mukammal na ho

yahī sochte sochte mujh ko niiñd aa ga.ī

aur havā der tak mere kānoñ meñ kahtī rahī

dekh le dekh le

maiñ ne ghabrā ke āñkheñ uThā.īñ

vahāñ tīrgī ke sivā aur koī na thā

maiñ ne dil se kahā

raat kaafī paḌī hai abhī svar haiñ

svar haiñ

abhī niiñd kā pahlā jhoñkā bhī aayā na thā

phir havā ne kahā dekh le dekh le

ḳhāmushī rañg hai

tīrgī kī sadā sañg hai

bante bante hue roz-o-shab naqsh-e-pā se zyāda nahīñ

aur tū sochtā hai ki takmīl ho

chehre itne shanāsā hoñ to un ko pahchān le

ye tamannā abas

use dekhne ki tamanna abas

wo kaisa lagega

abhi dhundli dhundli lakiron ne chehra banaya nahin

abhi us ki aawaz bhi resha resha hai

us ne guzarti hui saaton ko bataya nahin

abhi barf ki tah ke niche hain aankhon ki jhilen

abhi jhil ki machhliyan zard suraj ki kirnon se mahrum hain

magar kya KHabar

wo azal se abad tak isi kaifiyat mein rahe

ya meri aankh us ki badalti hui rangton se shanasa na ho

main use kyun adhura kahun

meri aankhen hi shayad mukammal na ho

yahi sochte sochte mujh ko nind aa gai

aur hawa der tak mere kanon mein kahti rahi

dekh le dekh le

main ne ghabra ke aankhen uThain

wahan tirgi ke siwa aur koi na tha

main ne dil se kaha

raat kafi paDi hai abhi swar hain

swar hain

abhi nind ka pahla jhonka bhi aaya na tha

phir hawa ne kaha dekh le dekh le

KHamushi rang hai

tirgi ki sada sang hai

bante bante hue roz-o-shab naqsh-e-pa se zyaada nahin

aur tu sochta hai ki takmil ho

chehre itne shanasa hon to un ko pahchan le

ye tamanna abas