ye tumne kya kaha tha

ye tum ne kyā kahā thā

is niile ākāsh ko baḌh ke chhūnā hai

har lamha aage baḌhte rahnā hai

lekin ai kaash aisā hotā

tum mujh se bichhaḌ na paate

maiñ raah kī har ik dushvārī ko

hañste hañste sah letī

dard kā jangal raste meñ

gar aa jaatā

na maiñ Dartī na ghabrātī

ākāsh ko baḌh ke

chhū letī

chāñd sitāre toḌ ke

maiñ le aatī

lekin ab raste pe

khaḌī huuñ maiñ tanhā

aur soch rahī huuñ

jo tum ne kahā thā mujh se

jo va.ada liyā thā mujh se

himmat jur.at

lafzoñ kī hurmat pe qaa.em rah kar

apne qalam kī sachchā.ī ko saath

hamesha rakh kar

aage baḌhte rahnā

ākāsh ko baḌh ke chhū lenā

ye va.ada puurā karnā hai

aur aage baḌhte rahnā hai

ye tum ne kya kaha tha

is nile aakash ko baDh ke chhuna hai

har lamha aage baDhte rahna hai

lekin ai kash aisa hota

tum mujh se bichhaD na pate

main rah ki har ek dushwari ko

hanste hanste sah leti

dard ka jangal raste mein

gar aa jata

na main Darti na ghabraati

aakash ko baDh ke

chhu leti

chand sitare toD ke

main le aati

lekin ab raste pe

khaDi hun main tanha

aur soch rahi hun

jo tum ne kaha tha mujh se

jo wada liya tha mujh se

himmat jurat

lafzon ki hurmat pe qaem rah kar

apne qalam ki sachchai ko sath

hamesha rakh kar

aage baDhte rahna

aakash ko baDh ke chhu lena

ye wada pura karna hai

aur aage baDhte rahna hai