zat ki kal koThari se aaKHiri nashriya

ab koī sahrā na ūñToñ kī qatāreñ

ghanTiyāñ sī jagmagātī ḳhvāhishoñ kī

dhyān ke kohre meñ lipTī

gungunātī haiñ magar mizrāb-e-ā.indā safar ke

rāstoñ ke saaz se nārāz haiñ

maiñ usī andhī galī kī qabr meñ marne lagā

bhaag niklī thī jahāñ se

ziist paidā.ish ke dukh de kar mujhe

aañkh se chipke nazāroñ ke hazāroñ daaġh haiñ

jo vaqt kī bārish se bhī dhulte nahīñ

kaun sī dīvār meñ raḳhne haiñ kitne

kaun darvāzoñ ko kaisī chaaT dīmak kī lagī haiñ

kaun sī chhat tak kisī ne

sīḌhiyoñ meñ Thokareñ kitnī rakhī haiñ

har kahānī yaad hai

sun mire ham-zād sun!

zindagī ke khoj meñ ab

hijrateñ vājib haiñ lekin

sarhadoñ se māvarā haiñ

yā havā.eñ yā sadā.eñ yā parinde

maiñ tamannā ke jahāzoñ kā musāfir

yā passportoñ aur visoñ ke air pocket Darāte haiñ mujhe

ab koi sahra na unTon ki qataren

ghanTiyan si jagmagati KHwahishon ki

dhyan ke kohre mein lipTi

gungunati hain magar mizrab-e-ainda safar ke

raston ke saz se naraaz hain

main usi andhi gali ki qabr mein marne laga

bhag nikli thi jahan se

zist paidaish ke dukh de kar mujhe

aankh se chipke nazaron ke hazaron dagh hain

jo waqt ki barish se bhi dhulte nahin

kaun si diwar mein raKHne hain kitne

kaun darwazon ko kaisi chaT dimak ki lagi hain

kaun si chhat tak kisi ne

siDhiyon mein Thokaren kitni rakhi hain

har kahani yaad hai

sun mere ham-zad sun!

zindagi ke khoj mein ab

hijraten wajib hain lekin

sarhadon se mawara hain

ya hawaen ya sadaen ya parinde

main tamanna ke jahazon ka musafir

ya passporton aur wison ke air pocket Daraate hain mujhe