zaban

kisī buzurg se ik roz maiñ ne ye pūchhā

bhalā durustī-e-īmān kā hai kyā nusḳha

kahā buzurg ne apnī zabān achchhī rakh

girah meñ bāñdh ke merī ye baat sachchī rakh

zabāñ durust to phir dil durust hai terā

ho dil durust to īmān puḳhta-tar hogā

zabāñ aham hai badan ke tamām a.azā meñ

milā zabān ko a.alā maqām a.azā meñ

zabāñ sañbhāl ke rakhtā hai har koī taa.ib

zabān jism meñ hotī hai aql kī naa.eb

zabān dil kī jo bāteñ bayān kartī hai

to dil meñ baat zabāñ kī har ik utartī hai

zabān achchhī agar hai to dil bhī raushan hai

zabāñ ḳharāb to dil zulmatoñ kā madfan hai

zabāñ se baat jis andāz kī nikaltī hai

usī lihāz se dil kī adā badaltī hai

tamām jism ko gar mamlikat kahā jaa.e

to baat sab kī samajh meñ ye saaf aa jaa.e

hukūmat aañkh kī mahdūd hai basārat tak

to kaan kī hai hukūmat mahz samā.at tak

har ek uzv ne paayā hai ek hī ḳhitta

zabāñ ke taabe magar mamlikat kā har hissa

zabāñ vaqār ko insān ke baḌhātī hai

yahī zabān magar saakh bhī ghaTātī hai

zabān achchhī hai terī to phir ye rahmat hai

zabāñ ḳharāb hai terī to phir ye zahmat hai

kisi buzurg se ek roz main ne ye puchha

bhala durusti-e-iman ka hai kya nusKHa

kaha buzurg ne apni zaban achchhi rakh

girah mein bandh ke meri ye baat sachchi rakh

zaban durust to phir dil durust hai tera

ho dil durust to iman puKHta-tar hoga

zaban aham hai badan ke tamam aaza mein

mila zaban ko aala maqam aaza mein

zaban sanbhaal ke rakhta hai har koi taib

zaban jism mein hoti hai aql ki naeb

zaban dil ki jo baaten bayan karti hai

to dil mein baat zaban ki har ek utarti hai

zaban achchhi agar hai to dil bhi raushan hai

zaban KHarab to dil zulmaton ka madfan hai

zaban se baat jis andaz ki nikalti hai

usi lihaz se dil ki ada badalti hai

tamam jism ko gar mamlikat kaha jae

to baat sab ki samajh mein ye saf aa jae

hukumat aankh ki mahdud hai basarat tak

to kan ki hai hukumat mahz samaat tak

har ek uzw ne paya hai ek hi KHitta

zaban ke tabe magar mamlikat ka har hissa

zaban waqar ko insan ke baDhati hai

yahi zaban magar sakh bhi ghaTati hai

zaban achchhi hai teri to phir ye rahmat hai

zaban KHarab hai teri to phir ye zahmat hai