zahrili taKHliq

ek pal meñ ḳhatm ho saktī hai vus.at dahr kī

choTiyoñ se choTiyoñ tak rāsta

aage ḳhalā

aur ḳhalā kī tīrgī meñ duur se aa.ī huī kirnoñ ke rañgoñ kī numūd

āsmāñ ke paañv par mahtāb o anjum ke sujūd

aur zamīñ kī raunaqoñ kā vahm fikr-e-raft-o-ūd

bun diye kis ne ye tār-o-pūd

kis ke haath meñ aayā nizām-e-kā.enāt

kis ke zarre ban ga.e duniyā sitāre āftāb

kis ne āvāra-ḳhayālī ko pilā.ī fikr-e-shīrīñ kī sharāb

kis ne ye sab kuchh banāyā

aur ḳhud tārīk pardoñ meñ kahīñ baiThā rahā

kyā ye sab phailāv mere vāste haiñ

yā maiñ ḳhud us kī purānī ruuh meñ baiThā huā

gin rahā huuñ us ke ashkoñ kī qatār

poñchhtā huuñ us ke aañsū māñgtā huuñ us se bhiik

(chāhtā huuñ ruuh kī ḳhātir sukūñ)

vo to ḳhud is ḳhair-o-shar ke jaal meñ uljhā huā

dard se betāb taḳhlīq-e-aziyyat se niDhāl

chīḳh kar kahtā hai ''mujh ko maar Dāl''

ek pal mein KHatm ho sakti hai wusat dahr ki

choTiyon se choTiyon tak rasta

aage KHala

aur KHala ki tirgi mein dur se aai hui kirnon ke rangon ki numud

aasman ke panw par mahtab o anjum ke sujud

aur zamin ki raunaqon ka wahm fikr-e-raft-o-ud

bun diye kis ne ye tar-o-pud

kis ke hath mein aaya nizam-e-kaenat

kis ke zarre ban gae duniya sitare aaftab

kis ne aawara-KHayali ko pilai fikr-e-shirin ki sharab

kis ne ye sab kuchh banaya

aur KHud tarik pardon mein kahin baiTha raha

kya ye sab phailaw mere waste hain

ya main KHud us ki purani ruh mein baiTha hua

gin raha hun us ke ashkon ki qatar

ponchhta hun us ke aansu mangta hun us se bhik

(chahta hun ruh ki KHatir sukun)

wo to KHud is KHair-o-shar ke jal mein uljha hua

dard se betab taKHliq-e-aziyyat se niDhaal

chiKH kar kahta hai mujh ko mar Dal