zamin-zad

junūn-e-hakimiyyat ḳhud pasandī kā ye laavā

kyuuñ ubaltā aur bahtā jā rahā hai

saarī dhartī par

kahāñ se hukm aatā hai

ye kaisī soch ke pairā.e meñ

tum Dhāle jaate ho

ki nafrat aur gahrī ho rahī hai

zamīñ-zādo

badan dhartī meñ bone se

faqat qabreñ hī ugtī haiñ

lahū bahtā rahā to

mehr-o-vafā ehsās ke

sab bahte dariyā suukh jā.eñge

zamīñ-zādo

ye kaise ḳhauf ke andhe kuñ.eñ meñ

qaid haiñ saare

ki ik duuje se bachne ke liye

ham bam banāte haiñ

aur ik duuje pe shab kī tīrgī meñ

vaar karte haiñ

zamīñ-zādo

zamīñ taqsīm kar ke

sarhadeñ kis ne banā.ī haiñ

vo din bhī aane vaalā hai

parindoñ ke liye bhī

jab koī qānūn aa.egā

sipāhī fāḳhtāoñ ke paroñ ko bhī TaToleñge

parinde dil meñ socheñge

hameñ insān ne

kyuuñ apnī saf meñ kar liyā shāmil

ye kis ne haq diyā hai is ko

hameñ apnī tarah samjhe

hameñ apnī tarah soche

zamīñ-zādo

ḳhalā kā zaḳhm baḌhtā jā rahā hai

pahāḌoñ kī safedī meñ pighal kar

ab nadī kī aañkh sī bahne lagī

kabhī manzar dhueñ meñ

qaid hote jā rahe haiñ

zamīñ-zādo

guloñ se titliyāñ aur titliyoñ se baaġh mat chhīno

ki ab to sharm aatī hai

mirī pahchān hone par

mujhe insān hone par

zamīñ-zādo

junun-e-hakimiyyat KHud pasandi ka ye lawa

kyun ubalta aur bahta ja raha hai

sari dharti par

kahan se hukm aata hai

ye kaisi soch ke pairae mein

tum Dhaale jate ho

ki nafrat aur gahri ho rahi hai

zamin-zado

badan dharti mein bone se

faqat qabren hi ugti hain

lahu bahta raha to

mehr-o-wafa ehsas ke

sab bahte dariya sukh jaenge

zamin-zado

ye kaise KHauf ke andhe kunen mein

qaid hain sare

ki ek duje se bachne ke liye

hum bam banate hain

aur ek duje pe shab ki tirgi mein

war karte hain

zamin-zado

zamin taqsim kar ke

sarhaden kis ne banai hain

wo din bhi aane wala hai

parindon ke liye bhi

jab koi qanun aaega

sipahi faKHtaon ke paron ko bhi TaTolenge

parinde dil mein sochenge

hamein insan ne

kyun apni saf mein kar liya shamil

ye kis ne haq diya hai is ko

hamein apni tarah samjhe

hamein apni tarah soche

zamin-zado

KHala ka zaKHm baDhta ja raha hai

pahaDon ki safedi mein pighal kar

ab nadi ki aankh si bahne lagi

kabhi manzar dhuen mein

qaid hote ja rahe hain

zamin-zado

gulon se titliyan aur titliyon se bagh mat chhino

ki ab to sharm aati hai

meri pahchan hone par

mujhe insan hone par

zamin-zado