zamin ka ye TukDa

zamīñ kā ye TukḌā

mire baḌhte qadmoñ ko chāroñ dishāoñ se apnī taraf khīñchtā hai

gale se lagā kar mujhe bhīñchtā hai

ki bārah baras se yahāñ dafn huuñ meñ

zamīñ kā ye TukḌā

mire dīda-o-dil kī manzil mirī zindagī hai

ki zarroñ meñ is ke ajab dilkashī hai

magar maiñ to is se gurezāñ rahā huuñ gurezāñ huuñ ab bhī

kahāñ sāmnā kar sakūñgā maiñ is kā ki us toda-e-ḳhāk ke rū-ba-rū meñ

pashemāñ thā kal bhī pashemāñ huuñ ab bhī

pashemāniyāñ mere shām-o-sahar kā muqaddar

pashemāniyoñ se mire roz-o-shab kī fazā.eñ mukaddar

zamīñ kā ye TukḌā

dikhātā hai mujh ko mirī bebasī kā vo ā.īna jis meñ

abhī tak vo ik sā.at-e-munfa.il mun.akis hai

ki jab vo mujhe yā use qatl karne ko le jā rahe the

vo hī jo yahāñ ḳhaak kī chādar oḌhe hue chup paḌā hai

jo merā hī ik paikar-e-ḳhūñ-shuda hai

to jab vo use yā mujhe qatl karne ko le jā rahe the

to be-dast-o-pā ik tamāshā.ī kī tarah maiñ un kā muñh tak rahā thā

samajh meñ na aa.e agar ab maiñ sochūñ mujhe kyā huā thā

mirī bebasī thī kisī lamha-e-be-basīrat kī sāzish

ki us meñ koī maslahat us kī thī dīd-o-dānish meñ qad jis kā sab se baḌā hai

jo har ahd-e-ā.inda-o-raftā ke ilm-o-illat kī had hai

azal se abad hai

zamīñ kā ye TukḌā

jahāñ aa ke maiñ ḳhud ko būḌhā sā mahsūs karne lagā huuñ

ḳhud andar hī andar bikharne lagā huuñ

mirī har tag-o-dau kā hāsil hai had hai

azal hai abad hai

zamīñ kā ye TukḌā

zamin ka ye TukDa

mere baDhte qadmon ko chaaron dishaon se apni taraf khinchta hai

gale se laga kar mujhe bhinchta hai

ki barah baras se yahan dafn hun mein

zamin ka ye TukDa

mere dida-o-dil ki manzil meri zindagi hai

ki zarron mein is ke ajab dilkashi hai

magar main to is se gurezan raha hun gurezan hun ab bhi

kahan samna kar sakunga main is ka ki us toda-e-KHak ke ru-ba-ru mein

pasheman tha kal bhi pasheman hun ab bhi

pashemaniyan mere sham-o-sahar ka muqaddar

pashemaniyon se mere roz-o-shab ki fazaen mukaddar

zamin ka ye TukDa

dikhata hai mujh ko meri bebasi ka wo aaina jis mein

abhi tak wo ek saat-e-munfail munakis hai

ki jab wo mujhe ya use qatl karne ko le ja rahe the

wo hi jo yahan KHak ki chadar oDhe hue chup paDa hai

jo mera hi ek paikar-e-KHun-shuda hai

to jab wo use ya mujhe qatl karne ko le ja rahe the

to be-dast-o-pa ek tamashai ki tarah main un ka munh tak raha tha

samajh mein na aae agar ab main sochun mujhe kya hua tha

meri bebasi thi kisi lamha-e-be-basirat ki sazish

ki us mein koi maslahat us ki thi did-o-danish mein qad jis ka sab se baDa hai

jo har ahd-e-ainda-o-rafta ke ilm-o-illat ki had hai

azal se abad hai

zamin ka ye TukDa

jahan aa ke main KHud ko buDha sa mahsus karne laga hun

KHud andar hi andar bikharne laga hun

meri har tag-o-dau ka hasil hai had hai

azal hai abad hai

zamin ka ye TukDa