zara dur chalne ki hasrat rahi hai

zarā duur chalne kī hasrat rahī hai

mohabbat hī sirf zindagī to nahīñ hai

ki tum se alag bhī mohabbat rahī hai

ḳhushī ke liye ghar hī kaafī nahīñ hai

ki ghar se alag kī bhī chāhat rahī hai

zarā duur chalne kī hasrat rahī hai

maiñ vīrāniyoñ kī udāsī kī tanhā.iyoñ kī pasand huuñ

jazīre banātī huuñ phir toḌtī huuñ

maiñ ḳhvāboñ ko ābād kartī bhī huuñ raakh kartī bhī huuñ

maiñ āzād uḌtā parinda huuñ jis ke liye

āsmāñ kī uḌāneñ bhī kam paḌ ga.ī haiñ

zamīñ tham ga.ī hai

charāġhoñ ko jalne kī aadat rahī hai

zarā duur chalne kī hasrat rahī hai

maiñ nādīda ḳhvāboñ kā ehsās huuñ

falak tak jo gūñje vo āvāz huuñ

diloñ tak jo pahuñche maiñ vo saaz huuñ

ghuTan qaid bandish ke ehsās se kore jazbāt se duur huuñ mutma.in

maiñ samundar huuñ bahtī havā aur garajtī huī mauj huuñ

maiñ sikandar columbus huuñ āzād huuñ

kahkashāñ se alag kahkashāñ aur bhī haiñ

jahānoñ meñ kyoñ ḳhud ko maiñ qaid rakkhūñ jahāñ aur bhī haiñ

abhī ishq ke imtihāñ aur bhī haiñ

merī fitrat meñ merī tāqat rahī hai

mohabbat hī sirf zindagī to nahīñ hai

ki tum se alag bhī mohabbat rahī hai

zarā duur chalne kī hasrat rahī hai

zara dur chalne ki hasrat rahi hai

mohabbat hi sirf zindagi to nahin hai

ki tum se alag bhi mohabbat rahi hai

KHushi ke liye ghar hi kafi nahin hai

ki ghar se alag ki bhi chahat rahi hai

zara dur chalne ki hasrat rahi hai

main viraniyon ki udasi ki tanhaiyon ki pasand hun

jazire banati hun phir toDti hun

main KHwabon ko aabaad karti bhi hun rakh karti bhi hun

main aazad uDta parinda hun jis ke liye

aasman ki uDanen bhi kam paD gai hain

zamin tham gai hai

charaghon ko jalne ki aadat rahi hai

zara dur chalne ki hasrat rahi hai

main nadida KHwabon ka ehsas hun

falak tak jo gunje wo aawaz hun

dilon tak jo pahunche main wo saz hun

ghuTan qaid bandish ke ehsas se kore jazbaat se dur hun mutmain

main samundar hun bahti hawa aur garajti hui mauj hun

main sikandar columbus hun aazad hun

kahkashan se alag kahkashan aur bhi hain

jahanon mein kyon KHud ko main qaid rakkhun jahan aur bhi hain

abhi ishq ke imtihan aur bhi hain

meri fitrat mein meri taqat rahi hai

mohabbat hi sirf zindagi to nahin hai

ki tum se alag bhi mohabbat rahi hai

zara dur chalne ki hasrat rahi hai