zara sabr!

ik na.e daur kī tartīb ke sāmāñ hoñge

dast-e-jamhūr meñ shāhoñ ke girebāñ hoñge

barq ḳhud apnī tajallī kī muhāfiz hogī!

phuul ḳhud apnī latāfat ke girebāñ hoñge

naġhma-o-sher kā sailāb umaD aa.egā

vaqt ke sehr se ġhunche bhī ġhazal-ḳhvāñ hoñge

naav mañjdhār se be-ḳhauf-o-ḳhatar khelegī

nāḳhudā barbat-e-tūfāñ pe rajaz-ḳhvāñ hoñge

rāh-rau apnī masāfat kā sila māñgeñge

rahnumā apnī siyāsat pe pashemāñ hoñge

rāst-guftār ki haiñ nāqid-e-aulād-e-farañg

vaqt kahtā hai ki phir dāḳhil-e-zindāñ hoñge

''tū kahāñ jā.egī kuchh apnā Thikāna kar le

ham to kal ḳhvāb-e-adam meñ shab-e-hijrāñ hoñge''

ek nae daur ki tartib ke saman honge

dast-e-jamhur mein shahon ke gireban honge

barq KHud apni tajalli ki muhafiz hogi!

phul KHud apni latafat ke gireban honge

naghma-o-sher ka sailab umaD aaega

waqt ke sehr se ghunche bhi ghazal-KHwan honge

naw manjdhaar se be-KHauf-o-KHatar khelegi

naKHuda barbat-e-tufan pe rajaz-KHwan honge

rah-rau apni masafat ka sila mangenge

rahnuma apni siyasat pe pasheman honge

rast-guftar ki hain naqid-e-aulad-e-farang

waqt kahta hai ki phir daKHil-e-zindan honge

tu kahan jaegi kuchh apna Thikana kar le

hum to kal KHwab-e-adam mein shab-e-hijran honge