zarqa

to kyā vo jhuuT thā

tū ne jo us laḌkī se bolā thā

maiñ terī jhiil jaisī

niilī āñkhoñ par ġhazal ke sher likkhūñgā

maiñ terī reshmī zulfoñ meñ

apnī nazm ke motī piro.ūñgā

maiñ terī dūdhiyā rañgat kalā.ī meñ

tilā.ī chūḌiyoñ aise

khanakte giit pahnāne kā ḳhvāhāñ huuñ

mujhe ma.alūm hai fursat nahīñ miltī

bahut se aur mauzuāt bhī

maanā zarūrī haiñ

magar us se kiyā va.ada

bhalā kyā kam zarūrī hai

tū aisā kar

koī apnī purānī nazm us ke naam kar de

yā

ġhazal ke sher meñ radd-o-badal kar ke

kisī sūrat bhī us kā tazkira kar de

jo terī shā.irī ke aa.ine ke sāmne

siñghār karne baiTh jaatī hai

nahīñ

mujh se to aisā bhī nahīñ mumkin

use merī sabhī nazmeñ

sabhī ġhazleñ

zabānī yaad hotī haiñ

use to merī vo ġhazleñ bhī azbar haiñ

jo maiñ ne

jā ke sadiyoñ ba.ad kahnī haiñ

maiñ un yāqūt hoñToñ par

faqat

ḳhāmoshiyāñ hī sabt kartā huuñ

to kya wo jhuT tha

tu ne jo us laDki se bola tha

main teri jhil jaisi

nili aankhon par ghazal ke sher likkhunga

main teri reshmi zulfon mein

apni nazm ke moti pirounga

main teri dudhiya rangat kalai mein

tilai chuDiyon aise

khanakte git pahnane ka KHwahan hun

mujhe malum hai fursat nahin milti

bahut se aur mauzuat bhi

mana zaruri hain

magar us se kiya wada

bhala kya kam zaruri hai

tu aisa kar

koi apni purani nazm us ke nam kar de

ya

ghazal ke sher mein radd-o-badal kar ke

kisi surat bhi us ka tazkira kar de

jo teri shairi ke aaine ke samne

singhaar karne baiTh jati hai

nahin

mujh se to aisa bhi nahin mumkin

use meri sabhi nazmen

sabhi ghazlen

zabani yaad hoti hain

use to meri wo ghazlen bhi azbar hain

jo main ne

ja ke sadiyon baad kahni hain

main un yaqut honTon par

faqat

KHamoshiyan hi sabt karta hun