zarurat kya hai

is qadar ham se gurezāñ kyuuñ ho

kuchh nahīñ ham haiñ faqat aks-e-ḳhayāl

ek tasvīr kā dhuñdlā sā nishāñ

harf-o-ma.anī ke pur-asrār tasalsul meñ kahīñ

an-kahī baat kā ehsās-e-ziyāñ

ajnabī shahar meñ chalte chalte rāsta haath pakaḌ le to ruko

jis tarah tez havā aa ke darīche pe kabhī

dastakeñ detī hai chup chaap palaT jaatī hai

aur guzargāh-e-samā.at meñ faqat gūñjte haiñ

us ke qadmoñ ke nishāñ

jo yaqīñ haiñ na gumāñ

kisī ik lamha-e-guzrāñ kī haqīqat kyā hai

kār-e-ulfat bhī agar kār-e-aziyyat hai to phir

āḳhir is kār-e-aziyyat kī zarūrat kyā hai

is qadar hum se gurezan kyun ho

kuchh nahin hum hain faqat aks-e-KHayal

ek taswir ka dhundla sa nishan

harf-o-mani ke pur-asrar tasalsul mein kahin

an-kahi baat ka ehsas-e-ziyan

ajnabi shahar mein chalte chalte rasta hath pakaD le to ruko

jis tarah tez hawa aa ke dariche pe kabhi

dastaken deti hai chup chap palaT jati hai

aur guzargah-e-samaat mein faqat gunjte hain

us ke qadmon ke nishan

jo yaqin hain na guman

kisi ek lamha-e-guzran ki haqiqat kya hai

kar-e-ulfat bhi agar kar-e-aziyyat hai to phir

aaKHir is kar-e-aziyyat ki zarurat kya hai