zinda dar-gor

maiñ ḳhudā kī qabr huuñ

ḳhudā mere andar dafn hai

bha.ī, maiñ ne apne hāthoñ se dafn kiyā hai use!

farq ye hai ki dafn hone ke bāvajūd zinda hai vo

zinda dar-gor

uupar se malba haTāne kī der hai

andar se ḳhudā nikal aa.egā

haañ haañ mere andar se nikal aa.egā

ye jo manoñ miTTī Daal rakkhī hai maiñ ne us par

aqīdoñ aur nazaryoñ kī

ḳhayāloñ aur vāhimoñ kī

ḳhvāhishoñ aur laġhviyāt kī

agar kisī roz kisī tūfān bārish meñ bah ga.ī

to dekhnā isī mere TūTe-phūTe badan kī ujaaḌ qabr se

jītā-jāgtā tar-o-tāza ḳhudā kaise numūdār ho jā.egā

jaise sar-ba-falak pahāḌiyoñ kī yaḳh-basta vādiyoñ meñ

barf pighalne ke ba.ad

dekhte hī dekhte

tā-hadd-e-nazar

phuul khil uThte haiñ

main KHuda ki qabr hun

KHuda mere andar dafn hai

bhai, main ne apne hathon se dafn kiya hai use!

farq ye hai ki dafn hone ke bawajud zinda hai wo

zinda dar-gor

upar se malba haTane ki der hai

andar se KHuda nikal aaega

han han mere andar se nikal aaega

ye jo manon miTTi Dal rakkhi hai main ne us par

aqidon aur nazaryon ki

KHayalon aur wahimon ki

KHwahishon aur laghwiyat ki

agar kisi roz kisi tufan barish mein bah gai

to dekhna isi mere TuTe-phuTe badan ki ujaD qabr se

jita-jagta tar-o-taza KHuda kaise numudar ho jaega

jaise sar-ba-falak pahaDiyon ki yaKH-basta wadiyon mein

barf pighalne ke baad

dekhte hi dekhte

ta-hadd-e-nazar

phul khil uThte hain