zindagi

ā.īye ham aap ko batlā.eñ kyā hai zindagī

mauj-e-ġham hai ek tūfān-e-balā hai zindagī

in amīroñ ke mohalloñ ko zarā sā chhoḌ kar

paas kī kachchī sī bastī meñ kabhī chaliye huzūr

kis tarah mahñgā.ī piitī hai javānī kā lahū

muflisī ma.asūm bachpan se churā letī hai nuur

noch kar āñkhoñ se mīThe ḳhvāb aur dil se umang

khīñch letī hai shabāb-e-husn kā saarā surūr

phuul se chehre ye murjhāte haiñ kyūñkar dekhiye

shīsha-e-dil muflisī kartī hai kaise chūr-chūr

ā.īye ham aap ko batlā.eñ kyā hai zindagī

ek beva kī javānī kā ye manzar dekhiye

bul-havas nazroñ se bachtī kāñptī jaatī hai vo

das gharoñ meñ jā ke bartan māñjhtī hai tab kahīñ

chaar luqme apne bachchoñ ke liye laatī hai vo

haiñ agar insāniyat se āshnā qalb-o-jigar

ek muflis baap kī lāchāriyoñ par ho nazar

saḳht garmī meñ bhī rickshaw khīñchtā jaatā hai vo

āñsūoñ se bāġh-e-dil bhī sīñchtā jaatā hai vo

bin-biyāhī beTiyoñ kā ġham piye jaatā hai vo

bas umīdoñ ke sahāre par jiye jaatā hai vo

ā.īye ham aap ko batlā.eñ kyā hai zindagī

mauj-e-ġham hai ek tūfān-e-balā hai zindagī

ek din bas ek din kamre kā a c chhoḌ kar

jeTh kī garmī meñ saḌkoñ par nikal kar dekhiye

puus kī in kaḌkaḌātī sardiyoñ meñ ek raat

āsmāñ kī chhat ke nīche shab-guzārī kījiye

zindagī hai kis qadar mushkil pata chal jā.egā

be-hisī kā āñkhoñ se chashma haTā kar dekhiye

aaiye hum aap ko batlaen kya hai zindagi

mauj-e-gham hai ek tufan-e-bala hai zindagi

in amiron ke mohallon ko zara sa chhoD kar

pas ki kachchi si basti mein kabhi chaliye huzur

kis tarah mahngai piti hai jawani ka lahu

muflisi masum bachpan se chura leti hai nur

noch kar aankhon se miThe KHwab aur dil se umang

khinch leti hai shabab-e-husn ka sara surur

phul se chehre ye murjhate hain kyunkar dekhiye

shisha-e-dil muflisi karti hai kaise chur-chur

aaiye hum aap ko batlaen kya hai zindagi

ek bewa ki jawani ka ye manzar dekhiye

bul-hawas nazron se bachti kanpti jati hai wo

das gharon mein ja ke bartan manjhti hai tab kahin

chaar luqme apne bachchon ke liye lati hai wo

hain agar insaniyat se aashna qalb-o-jigar

ek muflis bap ki lachaariyon par ho nazar

saKHt garmi mein bhi rickshaw khinchta jata hai wo

aansuon se bagh-e-dil bhi sinchta jata hai wo

bin-biyahi beTiyon ka gham piye jata hai wo

bas umidon ke sahaare par jiye jata hai wo

aaiye hum aap ko batlaen kya hai zindagi

mauj-e-gham hai ek tufan-e-bala hai zindagi

ek din bas ek din kamre ka a c chhoD kar

jeTh ki garmi mein saDkon par nikal kar dekhiye

pus ki in kaDkaDati sardiyon mein ek raat

aasman ki chhat ke niche shab-guzari kijiye

zindagi hai kis qadar mushkil pata chal jaega

be-hisi ka aankhon se chashma haTa kar dekhiye