zindagi

duniyā meñ tujh ko hai agar armān-e-zindagī

tadbīr se tū bāñdh le paimān-e-zindagī

tāb-o-tab-e-amal ḳhalish-e-koshish-e-davām

un se baham pahuñchtā hai sāmān-e-zindagī

kar le rafū tū joshish-e-kirdār se ise

kyuuñ kar rahā hai chaak garebān-e-zindagī

jis zindagī meñ josh-e-ḳhudī kā na ho ḳhayāl

vo zindagī nahīñ kabhī shāyān-e-zindagī

kar nuuh ban ke us kā to har-dam muqābla

tūfān-e-zindagī hai ye tūfān-e-zindagī

mahdūd tū samajhne lagā hai ise magar

be-intihā vasī.a hai maidān-e-zindagī

duniya mein tujh ko hai agar arman-e-zindagi

tadbir se tu bandh le paiman-e-zindagi

tab-o-tab-e-amal KHalish-e-koshish-e-dawam

un se baham pahunchta hai saman-e-zindagi

kar le rafu tu joshish-e-kirdar se ise

kyun kar raha hai chaak gareban-e-zindagi

jis zindagi mein josh-e-KHudi ka na ho KHayal

wo zindagi nahin kabhi shayan-e-zindagi

kar nuh ban ke us ka to har-dam muqabla

tufan-e-zindagi hai ye tufan-e-zindagi

mahdud tu samajhne laga hai ise magar

be-intiha wasia hai maidan-e-zindagi