zindagi chehra mangti hai

aaj zindagī kī tārīḳh thī

aur vo us ke sāmne chīḳh rahī thī

jis ne ā.ankhoñ par siyāh paTTī bāñdh rakhī thī

''ab maiñ be-chehra kaise jiyūñ?

maiñ ne to apnā chehra kaaT kaaT kar

be-chehra nasloñ meñ baañT diyā

merī kor-chashmī gavāh hai

ki maiñ ne apne sabhī manzar

be-manzar ā.ankhoñ ko de diye

merī tamām ḳhvāhisheñ na.ī nasl ne bech kar

apnī ārzueñ ḳharīd liiñ

hañsne ke liye mere paas ab hoñT nahīñ haiñ

nasloñ ko dhuup se bachāte bachāte

jab sar meñ chāñdī ug aatī hai

to nasloñ ke ḳhuun meñ safedī kyuuñ dauḌne lagtī hai?

har taraf mere hī diye hue chehre ghuum rahe haiñ

aur maiñ apnā chehra DhūñD rahī huuñ

āḳhir be-chehra ho kar kaise jiyā jā saktā hai?''

magar us kī ā.ankhoñ par to paTTī bañdhī thī

vo kaise be-chehra zindagī ko dekhtā?

is ke haath se juḌā tarāzū kāñpne lagā

us ke paas na.e chehre nahīñ the

aur us ne zindagī ko ek lambī peshī de dī

aaj zindagi ki tariKH thi

aur wo us ke samne chiKH rahi thi

jis ne aaankhon par siyah paTTi bandh rakhi thi

ab main be-chehra kaise jiyun?

main ne to apna chehra kaT kaT kar

be-chehra naslon mein banT diya

meri kor-chashmi gawah hai

ki main ne apne sabhi manzar

be-manzar aaankhon ko de diye

meri tamam KHwahishen nai nasl ne bech kar

apni aarzuen KHarid lin

hansne ke liye mere pas ab honT nahin hain

naslon ko dhup se bachate bachate

jab sar mein chandi ug aati hai

to naslon ke KHun mein safedi kyun dauDne lagti hai?

har taraf mere hi diye hue chehre ghum rahe hain

aur main apna chehra DhunD rahi hun

aaKHir be-chehra ho kar kaise jiya ja sakta hai?

magar us ki aaankhon par to paTTi bandhi thi

wo kaise be-chehra zindagi ko dekhta?

is ke hath se juDa taraazu kanpne laga

us ke pas nae chehre nahin the

aur us ne zindagi ko ek lambi peshi de di