zindagi ke darwaze par

pā-barhana-o-sarāsima sā ik jamm-e-ġhafīr

apne hāthoñ meñ liye mash.al-e-be-sho.ala-o-dūd

muztarib ho ke gharoñdoñ se nikal aayā hai

jaise ab toḌ hī Dālegā ye barsoñ kā jumūd

un papoToñ meñ ye pathrā.ī huī sī āñkheñ

jin meñ fardā kā koī ḳhvāb ujāgar hī nahīñ

kaise DhūñDeñgī dar-zīst kahāñ DhūñDeñgī

un ko vo tishnagī-e-shauq mayassar hī nahīñ

jaise sadiyoñ ke chaTānoñ pe tarāshe hue but

ek dīvāne musavvir kī tabī.at kā ubaal

nāchte nāchte ġhāroñ se nikal aa.e hoñ

aur vāpas inhīñ ġhāroñ meñ ho jaane kā ḳhayāl

zindagī apne darīchoñ meñ hai mushtāq abhī

aur ye raqs-e-tilismāna ke rañgīñ saa.e

us kī nazroñ ko diye jaate haiñ paiham dhoke

jaise bas aañkh jhapakne meñ vo uḌ kar aa.e

shahpar-e-maut kisī ġhūl-e-bayābāñ kī tarah

qahqahe bhartā hai ḳhāmosh fazāoñ meñ sadā

kāñpte kāñpte ik baar simaT jaatī hai

ek tārīk sā parda yūñhī āvezāñ rahā

koī darvāze pe dastak hai na qadmoñ kā nishāñ

chand pur-haul se asrār tah-e-sāya-e-dar

ḳhud hī sargoshiyāñ karte haiñ koī jaise kahe

phir palaT aa.e ye kam-baḳht vahī shām-o-sahar

nāchtā rahtā hai darvāze ke bāhar ye hujūm

apne hāthoñ meñ liye mash.al-e-be-sho.ala-o-dūd

zindagī apne darīchoñ meñ hai mushtāq abhī

kyā ḳhabar toḌ hī de baḌh ke koī qufl-e-jumūd

pa-barhana-o-sarasima sa ek jamm-e-ghafir

apne hathon mein liye mashal-e-be-shoala-o-dud

muztarib ho ke gharondon se nikal aaya hai

jaise ab toD hi Dalega ye barson ka jumud

un papoTon mein ye pathrai hui si aankhen

jin mein farda ka koi KHwab ujagar hi nahin

kaise DhunDengi dar-zist kahan DhunDengi

un ko wo tishnagi-e-shauq mayassar hi nahin

jaise sadiyon ke chaTanon pe tarashe hue but

ek diwane musawwir ki tabiat ka ubaal

nachte nachte ghaaron se nikal aae hon

aur wapas inhin ghaaron mein ho jaane ka KHayal

zindagi apne darichon mein hai mushtaq abhi

aur ye raqs-e-tilismana ke rangin sae

us ki nazron ko diye jate hain paiham dhoke

jaise bas aankh jhapakne mein wo uD kar aae

shahpar-e-maut kisi ghul-e-bayaban ki tarah

qahqahe bharta hai KHamosh fazaon mein sada

kanpte kanpte ek bar simaT jati hai

ek tarik sa parda yunhi aawezan raha

koi darwaze pe dastak hai na qadmon ka nishan

chand pur-haul se asrar tah-e-saya-e-dar

KHud hi sargoshiyan karte hain koi jaise kahe

phir palaT aae ye kam-baKHt wahi sham-o-sahar

nachta rahta hai darwaze ke bahar ye hujum

apne hathon mein liye mashal-e-be-shoala-o-dud

zindagi apne darichon mein hai mushtaq abhi

kya KHabar toD hi de baDh ke koi qufl-e-jumud