zindagi

maiñ zindagī huuñ zindagī ye hai mirā nām-o-nishāñ

jumbish dah-e-barg-o-samar

sūrat-gar-e-shām-o-sahar

jān-o-dil-e-shams-o-qamar

saut-o-navā-e-bahr-o-bar

hai mujh se gardish meñ zamīñ mujh se hai daur-e-āsmāñ

maiñ zindagī huuñ zindagī ye hai mirā nām-o-nishāñ

in.aam ye mere liye

aish-o-tarab mere liye

haiñ roz-o-shab mere liye

haiñ ek sab mere liye

mazdūr kā ho ḳhash-kada yā ahl-e-daulat kā makāñ

maiñ zindagī huuñ zindagī ye hai mirā nām-o-nishāñ

mutrib kī āvāzoñ meñ huuñ

chiḌiyoñ kī parvāzoñ meñ huuñ

bajte hue sāzoñ meñ huuñ

shah-zor jaañ baazū meñ huuñ

uThte haiñ mere zor se tūfān hoñ yā āñdhiyāñ

maiñ zindagī huuñ zindagī ye hai mirā nām-o-nishāñ

himmat hai merī sifat-shikan

izzat hai merā bāñkpan

hai ājizī merā chalan

kyā ġham jo hai rāh-e-mehan

hai dast-e-qudrat meñ mire raḳhsh-e-taraqqī kī inaañ

maiñ zindagī huuñ zindagī ye hai mirā nām-o-nishāñ

aadam ke dil kā raaz huuñ

jibrīl kī parvāz huuñ

dā.ūd kī āvāz huuñ

maiñ nuuh kī dam-sāz huuñ

yūsuf ne merī chaah kī iisā kī huuñ rūh-e-ravāñ

maiñ zindagī huuñ zindagī ye hai mirā nām-o-nishāñ

mere qadam jab DaT ga.e

teġhoñ ke bādal chhaT ga.e

ḳhud sher pīchhe haT ga.e

ḳhatroñ ke halqe kaT ga.e

maiñ ne fanā ke rū-ba-rū hañs hañs ke liiñ añgḌā.iyāñ

maiñ zindagī huuñ zindagī ye hai mirā nām-o-nishāñ

main zindagi hun zindagi ye hai mera nam-o-nishan

jumbish dah-e-barg-o-samar

surat-gar-e-sham-o-sahar

jaan-o-dil-e-shams-o-qamar

saut-o-nawa-e-bahr-o-bar

hai mujh se gardish mein zamin mujh se hai daur-e-asman

main zindagi hun zindagi ye hai mera nam-o-nishan

inam ye mere liye

aish-o-tarab mere liye

hain roz-o-shab mere liye

hain ek sab mere liye

mazdur ka ho KHash-kada ya ahl-e-daulat ka makan

main zindagi hun zindagi ye hai mera nam-o-nishan

mutrib ki aawazon mein hun

chiDiyon ki parwazon mein hun

bajte hue sazon mein hun

shah-zor jaan bazu mein hun

uThte hain mere zor se tufan hon ya aandhiyan

main zindagi hun zindagi ye hai mera nam-o-nishan

himmat hai meri sifat-shikan

izzat hai mera bankpan

hai aajizi mera chalan

kya gham jo hai rah-e-mehan

hai dast-e-qudrat mein mere raKHsh-e-taraqqi ki inan

main zindagi hun zindagi ye hai mera nam-o-nishan

aadam ke dil ka raaz hun

jibril ki parwaz hun

daud ki aawaz hun

main nuh ki dam-saz hun

yusuf ne meri chah ki isa ki hun ruh-e-rawan

main zindagi hun zindagi ye hai mera nam-o-nishan

mere qadam jab DaT gae

teghon ke baadal chhaT gae

KHud sher pichhe haT gae

KHatron ke halqe kaT gae

main ne fana ke ru-ba-ru hans hans ke lin angDaiyan

main zindagi hun zindagi ye hai mera nam-o-nishan