zindagi

pūchh baiThā pūchhne vaalā ki kyā hai zindagī

shoḳhī-e-gul ne kahā bād-e-sabā hai zindagī

ek titlī ne kahā husn-o-adā hai zindagī

mast-o-be-ḳhud hañs ke bolā mai-kada hai zindagī

husn kā shaidā kahe gul kī adā hai zindagī

ek dul.han ne kahā rang-e-hinā hai zindagī

ek 'āshiq ne kahā ik dilrubā hai zindagī

ik mufakkir ne kahā qaa.em sadā hai zindagī

ek shā'ir ne kahā soz-e-navā hai zindagī

ek birhan ro ke bolī bevafā hai zindagī

ek ahl-e-fan kahe āb-e-baqā hai zindagī

ek momin ne kahā qurb-e-ḳhudā hai zindagī

ek jābir ne kahā jaur-o-jafā hai zindagī

tālib-e-sarvat kahe paisa Takā hai zindagī

ek bhūke ne kahā vāfir ġhizā hai zindagī

ik mujāhid ne kahā nāz-e-viġhā hai zindagī

qaul-e-ḳhud-sar thā ki tāqat kā nasha hai zindagī

ik qarīb-ul-marg bolā ḳhvāb sā hai zindagī

sab kī sun kar faisla us ne diyā hai zindagī

rū-barū jis ke jo ruḳh aayā lagā hai zindagī

ranj-o-rāhat meñ sabhī kī kaT to jaatī hai magar

jo jiyā har haal meñ ḳhush vo jiyā hai zindagī

puchh baiTha puchhne wala ki kya hai zindagi

shoKHi-e-gul ne kaha baad-e-saba hai zindagi

ek titli ne kaha husn-o-ada hai zindagi

mast-o-be-KHud hans ke bola mai-kada hai zindagi

husn ka shaida kahe gul ki ada hai zindagi

ek dulhan ne kaha rang-e-hina hai zindagi

ek 'ashiq ne kaha ek dilruba hai zindagi

ek mufakkir ne kaha qaem sada hai zindagi

ek sha'ir ne kaha soz-e-nawa hai zindagi

ek birhan ro ke boli bewafa hai zindagi

ek ahl-e-fan kahe aab-e-baqa hai zindagi

ek momin ne kaha qurb-e-KHuda hai zindagi

ek jabir ne kaha jaur-o-jafa hai zindagi

talib-e-sarwat kahe paisa Taka hai zindagi

ek bhuke ne kaha wafir ghiza hai zindagi

ek mujahid ne kaha naz-e-wigha hai zindagi

qaul-e-KHud-sar tha ki taqat ka nasha hai zindagi

ek qarib-ul-marg bola KHwab sa hai zindagi

sab ki sun kar faisla us ne diya hai zindagi

ru-baru jis ke jo ruKH aaya laga hai zindagi

ranj-o-rahat mein sabhi ki kaT to jati hai magar

jo jiya har haal mein KHush wo jiya hai zindagi