zindagi

zindagī ḳhvāb ik suhānā hai

zindagī dard kā fasāna hai

zindagī ranj-o-ġham kā lamha bhī

zindagī hai nashāt-o-naġhma bhī

zindagī sher-o-naġhmagī kā ḳhumār

zindagī kaif-o-sarḳhushī kī bahār

zindagī naqsh-e-nā-murādī bhī

zindagī raqs bhī hai shādī bhī

zindagī phuul hai kabhī hai ḳhaar

taḳht-e-shāhī hai aur kabhī hai daar

saat rangoñ kā ye nagīna hai

zindagī be-bahā ḳhazīna hai

qadr jo ranj-o-ġham kī jānegā

'shauq' vo zindagī ko mānegā

zindagi KHwab ek suhana hai

zindagi dard ka fasana hai

zindagi ranj-o-gham ka lamha bhi

zindagi hai nashat-o-naghma bhi

zindagi sher-o-naghmagi ka KHumar

zindagi kaif-o-sarKHushi ki bahaar

zindagi naqsh-e-na-muradi bhi

zindagi raqs bhi hai shadi bhi

zindagi phul hai kabhi hai KHar

taKHt-e-shahi hai aur kabhi hai dar

sat rangon ka ye nagina hai

zindagi be-baha KHazina hai

qadr jo ranj-o-gham ki jaanega

'shauq' wo zindagi ko manega