ziya

ruḳhsār-o-lab kaukab-sifat

itne ki yādoñ ke liye mumkin nahīñ tajdīd bhī

ḳhurshīd bhī nāhīd bhī

is par vo jazb-e-be-karāñ sañgīñ hisāroñ kā adū

vo māh-rū

aise gurezāñ jaise sāhil se palaTtī mauj

āmezish kahāñ

kitnā ziyā'-e-jism-o-jāñ

jis meñ na thī mauj-e-sabā mauj-e-ziyā

aisā ziyā'-e-nāravā

ab dīda-e-hairāñ mirā

ā.īna saañ sākit misāl-e-shām-e-yazdāñ mahv-e-taḳh’īl-o-gumāñ

kitne sitāre hosh ke

pahnā-e-sub.h-e-husn meñ kho.e ga.e

āshuftagī sahrā-o-dariyā kī tarah

sahbā-e-ġhaltāñ kī tarah

husn ek shāḳh-e-be-samar

mizrāb-e-jāñ soz-e-fuġhāñ

jaise shabistān-e-shab-e-mahtāb par be-sūd mañDlā.ī havā

ḳhvāb-e-numū nāpaid-tar

vo be-ḳhabar ruḳhsār-o-lab

is shauq ke kitne shabistāñ ḳhvāb se aarī hue

be-mehr chehroñ kī ka.ī shāmeñ nazar ke sāmne

jaise matā.a-e-narm dast-e-be-hunar ke sāmne

ruKHsar-o-lab kaukab-sifat

itne ki yaadon ke liye mumkin nahin tajdid bhi

KHurshid bhi nahid bhi

is par wo jazb-e-be-karan sangin hisaron ka adu

wo mah-ru

aise gurezan jaise sahil se palaTti mauj

aamezish kahan

kitna ziya'-e-jism-o-jaan

jis mein na thi mauj-e-saba mauj-e-ziya

aisa ziya'-e-narawa

ab dida-e-hairan mera

aaina san sakit misal-e-sham-e-yazdan mahw-e-taKH’il-o-guman

kitne sitare hosh ke

pahna-e-subh-e-husn mein khoe gae

aashuftagi sahra-o-dariya ki tarah

sahba-e-ghaltan ki tarah

husn ek shaKH-e-be-samar

mizrab-e-jaan soz-e-fughan

jaise shabistan-e-shab-e-mahtab par be-sud manDlai hawa

KHwab-e-numu napaid-tar

wo be-KHabar ruKHsar-o-lab

is shauq ke kitne shabistan KHwab se aari hue

be-mehr chehron ki kai shamen nazar ke samne

jaise mataa-e-narm dast-e-be-hunar ke samne