na jaane is qadar kyuuñ aap dīvāne se Darte haiñ

charāġh-e-anjuman haiñ aur parvāne se Darte haiñ

na jaane is qadar kyun aap diwane se Darte hain

charagh-e-anjuman hain aur parwane se Darte hain

kahāñ thī manzil-e-maqsūd apnī qismat meñ

kisī kī rāhguzar bhī milī hai mushkil se

kahan thi manzil-e-maqsud apni qismat mein

kisi ki rahguzar bhi mili hai mushkil se

ham kahāñ hoñge na jaane is tamāshā-gāh meñ

kis tamāshā.ī se pahle kis tamāshā.ī ke ba.ad

hum kahan honge na jaane is tamasha-gah mein

kis tamashai se pahle kis tamashai ke baad

bahār aa.egī gulshan meñ to dār-o-gīr bhī hogī

jahāñ ahl-e-junūñ hoñge vahāñ zanjīr bhī hogī

bahaar aaegi gulshan mein to dar-o-gir bhi hogi

jahan ahl-e-junun honge wahan zanjir bhi hogi

daaġh dil ke haiñ salāmat to koī baat nahīñ

tīrgī laakh sahī sub.h kā imkāñ rakhnā

dagh dil ke hain salamat to koi baat nahin

tirgi lakh sahi subh ka imkan rakhna

vo hamārī samt apnā ruḳh badaltā kyuuñ nahīñ

raat to guzrī magar sūraj nikaltā kyuuñ nahīñ

wo hamari samt apna ruKH badalta kyun nahin

raat to guzri magar suraj nikalta kyun nahin

ye irtiqā-e-bashar kī hai kaun sī manzil

ki is kī zad meñ ḳhudā bhī hai kā.enāt bhī hai

ye irtiqa-e-bashar ki hai kaun si manzil

ki is ki zad mein KHuda bhi hai kaenat bhi hai

ham to us vaqt samajhte haiñ ki aatī hai bahār

dasht se jab koī jhankār sī aa jaatī hai

hum to us waqt samajhte hain ki aati hai bahaar

dasht se jab koi jhankar si aa jati hai