idhar aao maiñ dil kī baat kah duuñ

ki tum se to koī parda nahīñ hai

idhar aao main dil ki baat kah dun

ki tum se to koi parda nahin hai

sūjhtī haiñ saiñkaḌoñ bāteñ mujhe

haath se mauqa nikal jaane ke baa'd

sujhti hain sainkaDon baaten mujhe

hath se mauqa nikal jaane ke ba'd

laakh duniyā ḳhilāf ho jaa.e

aap kā dil to saaf ho jaa.e

lakh duniya KHilaf ho jae

aap ka dil to saf ho jae

mohabbat maiñ bhī kartā huuñ mohabbat tum bhī karte ho

magar donoñ meñ muñh-dekhī mohabbat kaun kartā hai

mohabbat main bhi karta hun mohabbat tum bhi karte ho

magar donon mein munh-dekhi mohabbat kaun karta hai

maiñ to husn-e-nazar samajhtā huuñ

log jis ko shabāb kahte haiñ

main to husn-e-nazar samajhta hun

log jis ko shabab kahte hain

hamesha ke liye vo jā chuke haiñ

ḳhayāl un kā magar jaatā nahīñ hai

hamesha ke liye wo ja chuke hain

KHayal un ka magar jata nahin hai

jo mere 'ilm meñ nahīñ aa.ī

vo ḳhatā to mu'āf ho jaa.e

jo mere 'ilm mein nahin aai

wo KHata to mu'af ho jae

husn ko lā-javāb kahte haiñ

ġhairat-e-āftāb kahte haiñ

husn ko la-jawab kahte hain

ghairat-e-aftab kahte hain