hameñ nahīñ hai ḳhabar kaun kis ke saath meñ hai

azal se ye dil-e-kambaḳht bas tumhārā hai

hamein nahin hai KHabar kaun kis ke sath mein hai

azal se ye dil-e-kambaKHt bas tumhaara hai

tumheñ jo dekh le ik baar dekhtā rah jaa.e

tumhārā husn mohabbat kā isti'āra hai

tumhein jo dekh le ek bar dekhta rah jae

tumhaara husn mohabbat ka isti'ara hai

un ke baġhair dil nahīñ lagtā makān meñ

maañ gar nahīñ to kuchh bhī nahīñ hai jahān meñ

un ke baghair dil nahin lagta makan mein

man gar nahin to kuchh bhi nahin hai jahan mein

ham zindagī pe dete haiñ tarjīh maut ko

ham to nahīñ haiñ tere talab-gār zindagī

hum zindagi pe dete hain tarjih maut ko

hum to nahin hain tere talab-gar zindagi

tumhārī diid kī ḳhvāhish liye vo baiThe haiñ

tumhārī diid hī bīmār kī shifā Thahrī

tumhaari did ki KHwahish liye wo baiThe hain

tumhaari did hi bimar ki shifa Thahri

logoñ kā ik hujūm thā matlab ke vāste

chāhe jo dil se ek bhī aisā nahīñ milā

logon ka ek hujum tha matlab ke waste

chahe jo dil se ek bhi aisa nahin mila

hai intihā kā hasīñ sūrat-e-gulāb hai vo

faqat hamāre sivā sab ko dastyāb hai vo

hai intiha ka hasin surat-e-gulab hai wo

faqat hamare siwa sab ko dastyab hai wo