niiñd vaise bhī nahīñ aatī magar

aañkh meñ ab bas ḳhumārī chāhiye

nind waise bhi nahin aati magar

aankh mein ab bas KHumari chahiye

kaun rahtā hai safar meñ 'umr bhar

mustaqil koī Thikānā chāhiye

kaun rahta hai safar mein 'umr bhar

mustaqil koi Thikana chahiye

khiḌkī ke apnī us ne bhī parde girā liye

mere bhī rāste kī rukāvaT nahīñ rahī

khiDki ke apni us ne bhi parde gira liye

mere bhi raste ki rukawaT nahin rahi

tanhā.iyāñ safar meñ musalsal banī rahīñ

phir bhī tumhārā naam pukāre chale ga.e

tanhaiyan safar mein musalsal bani rahin

phir bhi tumhaara nam pukare chale gae

ghar banāne meñ 'umr lagtī hai

ghar meñ bante makān dekhe haiñ

ghar banane mein 'umr lagti hai

ghar mein bante makan dekhe hain

khaTkhaTāyā gayā hai dar itnā

dastakoñ ke nishān dekhe haiñ

khaTkhaTaya gaya hai dar itna

dastakon ke nishan dekhe hain

shajar mahfūz āñgan kā rakho tum

parinde chahchahānā chāhte haiñ

shajar mahfuz aangan ka rakho tum

parinde chahchahana chahte hain

mujhe bhī paḌh liyā hotā sabhī ne

mirā lahja agar aḳhbār hotā

mujhe bhi paDh liya hota sabhi ne

mera lahja agar aKHbar hota