kaho husn-e-jamāl-yār se ye itnī saj-dhaj kyoñ

bharī barsāt meñ paudoñ ko paanī kaun detā hai

kaho husn-e-jamal-yar se ye itni saj-dhaj kyon

bhari barsat mein paudon ko pani kaun deta hai

husn kī devī banī baiThī haiñ dil hai but-kada

chand muslim laḌkiyoñ ne ham ko hindū kar diyā

husn ki dewi bani baiThi hain dil hai but-kada

chand muslim laDkiyon ne hum ko hindu kar diya

jab kamsin se ishq laḌānā paḌtā hai

bachchoñ jaisā paaTh paḌhānā paḌtā hai

jab kamsin se ishq laDana paDta hai

bachchon jaisa paTh paDhana paDta hai

zillat se to behtar hai ki ik jang laḌo tum

yuuñ haar bhī jāoge to buzdil na rahoge

zillat se to behtar hai ki ek jang laDo tum

yun haar bhi jaoge to buzdil na rahoge

ḳhūñ-bahā dete haiñ zālim taḳht paane ke liye

log kitnā gir ga.e ḳhud ko uThāne ke liye

KHun-baha dete hain zalim taKHt pane ke liye

log kitna gir gae KHud ko uThane ke liye

aaj 'az.har' se kyā mile ho tum

phuul jaise khile khile ho tum

aaj 'azhar' se kya mile ho tum

phul jaise khile khile ho tum

har vaqt kase rahte haiñ maaoñ kī piiTh se

godī meñ nahīñ khelte mazdūr ke bachche

har waqt kase rahte hain maon ki piTh se

godi mein nahin khelte mazdur ke bachche

un ke ḳhemoñ meñ haiñ sab log kamar-basta magar

ham meñ ġhaflat kī hai bhar-mār ḳhudā ḳhair kare

un ke KHemon mein hain sab log kamar-basta magar

hum mein ghaflat ki hai bhar-mar KHuda KHair kare

tum ne dekhā nahīñ hogā kabhī aisā qātil

jo lahū chūsne kā jashn manāne nikle

tum ne dekha nahin hoga kabhi aisa qatil

jo lahu chusne ka jashn manane nikle

ik ġhazal to mire hāthoñ se misālī ho jaa.e

kaash ki tū mirā mahbūb-e-ḳhayālī ho jaa.e

ek ghazal to mere hathon se misali ho jae

kash ki tu mera mahbub-e-KHayali ho jae

hamāre jitne bachche the parinde ho ga.e saare

ye vo ghar hai jahāñ par ab koī bachcha nahīñ rahtā

hamare jitne bachche the parinde ho gae sare

ye wo ghar hai jahan par ab koi bachcha nahin rahta

tum chitā in kī jalāo na karo dafn inheñ

pyaar ke ḳhat haiñ ye hindū yā musalmān nahīñ

tum chita in ki jalao na karo dafn inhen

pyar ke KHat hain ye hindu ya musalman nahin

de kar fareb mujh ko gayā thā vo shoḳh-tan

khā kar fareb lauTā to siine se lag gayā

de kar fareb mujh ko gaya tha wo shoKH-tan

kha kar fareb lauTa to sine se lag gaya