اہتمام صادق، جن کا اصل نام اہتمام الحق ہے، معاصر اردو شاعری کا ایک نمایاں نام ہیں۔ وہ 11 نومبر 1993 کو ضلع بلرام پور، اتر پردیش کے قصبے گُلرِہا میں پیدا ہوئے۔ ان کے والد، کتاب اللہ مرحوم، پیشے سے کسان تھے، جبکہ والدہ، ناظمہ خاتون، ایک گھریلو خاتون ہیں۔ ابتدائی تعلیم گُلرِہا کے مدرسہ جامعہ عربیہ قاسم العلوم میں حاصل کی اور ثانوی تعلیم مدرسہ عربیہ خیر العلوم، ڈومریا گنج سے مکمل کی۔
اعلیٰ تعلیم کے لیے انہوں نے دہلی کا رخ کیا اور جامعہ ملیہ اسلامیہ سے 2018 میں اردو میں بی اے اور 2020 میں ایم اے مکمل کیا۔ اردو ادب کے فروغ کے لیے کوشاں ممتاز ادارے، ریختہ فاؤنڈیشن، سے 2022 میں وابستہ ہوئے اور تاحال اسی ادارے سے منسلک ہیں۔
ادبی ذوق انہیں ورثے میں ملا، اور گھر کے ادب دوست ماحول نے ان کی فکری نشوونما میں اہم کردار ادا کیا۔ پندرہ سال کی عمر میں شاعری کی طرف مائل ہوئے، تاہم ان کا باقاعدہ ادبی سفر 2016 سے شروع ہوا، جو مسلسل جاری ہے۔ ان کی شاعری میں روایت اور جدید حسیت کا امتزاج پایا جاتا ہے، جو انہیں ہم عصر شعرا میں ایک منفرد مقام عطا کرتا ہے۔