sitāroñ se shab-e-ġham kā to dāman jagmagā uThThā

magar aañsū bahā kar hijr ke māroñ ne kyā paayā

sitaron se shab-e-gham ka to daman jagmaga uThTha

magar aansu baha kar hijr ke maron ne kya paya

nadīm tārīḳh-e-fat.h-e-dānish bas itnā likh kar tamām kar de

ki shātirān-e-jahāñ ne āḳhir ḳhud apnī chāloñ se maat khaa.ī

nadim tariKH-e-fath-e-danish bas itna likh kar tamam kar de

ki shatiran-e-jahan ne aaKHir KHud apni chaalon se mat khai

mire nāḳhudā na ghabrā ye nazar hai apnī apnī

tire sāmne hai tūfāñ mire sāmne kinārā

mere naKHuda na ghabra ye nazar hai apni apni

tere samne hai tufan mere samne kinara

ġham-e-ishq hī ne kaaTī ġham-e-ishq kī musībat

isī mauj ne Duboyā isī mauj ne ubhārā

gham-e-ishq hi ne kaTi gham-e-ishq ki musibat

isi mauj ne Duboya isi mauj ne ubhaara

kisī kī raah meñ 'fārūq' barbād-e-vafā ho kar

burā kyā hai ki apne haq meñ achchhā kar liyā maiñ ne

kisi ki rah mein 'faruq' barbaad-e-wafa ho kar

bura kya hai ki apne haq mein achchha kar liya main ne

allāh ke bandoñ kī hai duniyā hī nirālī

kāñTe koī botā hai to ugte haiñ gulistāñ

allah ke bandon ki hai duniya hi nirali

kanTe koi bota hai to ugte hain gulistan

mirī zindagī kā mahvar yahī soz-o-sāz-e-hastī

kabhī jazb-e-vālhāna kabhī zabt-e-ārifāna

meri zindagi ka mahwar yahi soz-o-saz-e-hasti

kabhi jazb-e-walhana kabhi zabt-e-arifana

yaqīñ mujhe bhī hai vo ā.eñge zarūr magar

vafā karegī kahāñ tak ki zindagī hī to hai

yaqin mujhe bhi hai wo aaenge zarur magar

wafa karegi kahan tak ki zindagi hi to hai