naam ke saath ek do alfāz kī dum chāhiye

sher phīkā hī sahī lekin tarannum chāhiye

nam ke sath ek do alfaz ki dum chahiye

sher phika hi sahi lekin tarannum chahiye

sāmne aġhyār ke be-parda aur mujh se hijāb

gulguloñ se hai use parhez aur guḌ khaa.e hai

samne aghyar ke be-parda aur mujh se hijab

gulgulon se hai use parhez aur guD khae hai

ban ke leader so rahe to zindagī kis kaam kī

amn qaa.em ho gayā to leaderī kis kaam kī

ban ke leader so rahe to zindagi kis kaam ki

amn qaem ho gaya to leaderi kis kaam ki

jhaḌtī haiñ un ke muñh se jo manzūm gāliyāñ

sun sun ke vaah vaah kiye jā rahā huuñ maiñ

jhaDti hain un ke munh se jo manzum galiyan

sun sun ke wah wah kiye ja raha hun main

ab bhī vo kah rahe haiñ ki mere buzurg ho

kuchh bhī huā na shave karāne se fā.eda

ab bhi wo kah rahe hain ki mere buzurg ho

kuchh bhi hua na shawe karane se faeda

shā.iroñ meñ ab kahāñ achchhe bure kā imtiyāz

loud-speaker ne sab kā bol-bālā kar diyā

shairon mein ab kahan achchhe bure ka imtiyaz

loud-speaker ne sab ka bol-baala kar diya

maiñ bhī ai jaañ koī harījan thā

bazm se kyuuñ uThā diyā tū ne

main bhi ai jaan koi harijan tha

bazm se kyun uTha diya tu ne

tirā marīz huuñ maiñ doctor kā ghar na batā

ye dard-e-ishq hai zālim koī buḳhār nahīñ

tera mariz hun main doctor ka ghar na bata

ye dard-e-ishq hai zalim koi buKHar nahin

naqsh-e-pā-e-yār ko chūmūñ to chūmūñ kis tarah

ho burā patlūn kā mujh se na baiThā jaa.e hai

naqsh-e-pa-e-yar ko chumun to chumun kis tarah

ho bura patlun ka mujh se na baiTha jae hai

tū vo gul hai ki jis meñ bū hī nahīñ

tū to gobhī kā phuul hai pyāre

tu wo gul hai ki jis mein bu hi nahin

tu to gobhi ka phul hai pyare

kise dāstān-e-masārif sunā.ūñ

maiñ is DheḌh aane meñ kyā kyā banā.ūñ

kise dastan-e-masarif sunaun

main is DheDh aane mein kya kya banaun