kisī sabab se agar boltā nahīñ huuñ maiñ

to yuuñ nahīñ ki tujhe sochtā nahīñ huuñ maiñ

kisi sabab se agar bolta nahin hun main

to yun nahin ki tujhe sochta nahin hun main

ham ne us chehre ko bāñdhā nahīñ mahtāb-misāl

ham ne mahtāb ko us ruḳh ke mumāsil bāñdhā

hum ne us chehre ko bandha nahin mahtab-misal

hum ne mahtab ko us ruKH ke mumasil bandha

mohabbat aur ibādat meñ farq to hai naañ

so chhīn lī hai tirī dostī mohabbat ne

mohabbat aur ibaadat mein farq to hai nan

so chhin li hai teri dosti mohabbat ne

gher letī hai koī zulf, koī bū-e-badan

jaan kar koī giraftār nahīñ hotā yaar

gher leti hai koi zulf, koi bu-e-badan

jaan kar koi giraftar nahin hota yar

mire vajūd ke andar mujhe talāsh na kar

ki is makān meñ aksar rahā nahīñ huuñ maiñ

mere wajud ke andar mujhe talash na kar

ki is makan mein aksar raha nahin hun main