Sher of Mahtab Alam
dil bhī toḌā to salīqe se na toḌā tum ne
bevafā.ī ke bhī ādāb huā karte haiñ
dil bhi toDa to saliqe se na toDa tum ne
bewafai ke bhi aadab hua karte hain
vatan ko phūñk rahe haiñ bahut se ahl-e-vatan
charāġh ghar ke haiñ sargarm ghar jalāne meñ
watan ko phunk rahe hain bahut se ahl-e-watan
charagh ghar ke hain sargarm ghar jalane mein
us ko āvāz do mohabbat se
us ke sab naam pyāre pyāre haiñ
us ko aawaz do mohabbat se
us ke sab nam pyare pyare hain
tum zamāne ke ho hamāre sivā
ham kisī ke nahīñ tumhāre haiñ
tum zamane ke ho hamare siwa
hum kisi ke nahin tumhaare hain
ye san kar merī nīndeñ uḌ ga.ī haiñ
koī merā bhī sapnā dekhtā hai
ye san kar meri ninden uD gai hain
koi mera bhi sapna dekhta hai
dil ko phir dard se ābād kiyā hai maiñ ne
muddatoñ ba.ad tujhe yaad kiyā hai maiñ ne
dil ko phir dard se aabaad kiya hai main ne
muddaton baad tujhe yaad kiya hai main ne
ik safar phir marī taqdīr huā jaatā hai
rāsta paañv kī zanjīr huā jaatā hai
ek safar phir mari taqdir hua jata hai
rasta panw ki zanjir hua jata hai
band kamre meñ zehn kyā badle
ghar se niklo to kuchh fazā badle
band kamre mein zehn kya badle
ghar se niklo to kuchh faza badle
zehn aise bhī na ban jaa.eñ nisāboñ vaale
guftugū meñ bhī huuñ alfāz kitāboñ vaale
zehn aise bhi na ban jaen nisabon wale
guftugu mein bhi hun alfaz kitabon wale
bane haiñ kitne chehre chāñd sūraj
ġhazal ke isti.ārātī ufuq par
bane hain kitne chehre chand suraj
ghazal ke istiaraati ufuq par
āñsuoñ ke jahāñ meñ rahte haiñ
ham isī kahkashāñ meñ rahte haiñ
aansuon ke jahan mein rahte hain
hum isi kahkashan mein rahte hain
nāqido tum to mire fan kī parakh rahne do
apne sone ko maiñ pītal nahīñ hone dūñgā
naqido tum to mere fan ki parakh rahne do
apne sone ko main pital nahin hone dunga
shar se hai ḳhair kā imkāñ paidā
nūr-o-zulmat hue juḌvāñ paidā
shar se hai KHair ka imkan paida
nur-o-zulmat hue juDwan paida
zamīñ kyuuñ mujh se Takrātī ufuq par
mirā ghar thā mire zaatī ufuq par
zamin kyun mujh se Takraati ufuq par
mera ghar tha mere zati ufuq par
