apāhij aur bhī kar deñgī ye baisākhiyāñ tujh ko

sahāre aadmī se istaqāmat chhīn lete haiñ

apahij aur bhi kar dengi ye baisakhiyan tujh ko

sahaare aadmi se istaqamat chhin lete hain

mujhe andar kā vahshī mo'tabar hone nahīñ detā

jidhar insāniyat hai ye udhar hone nahīñ detā

mujhe andar ka wahshi mo'tabar hone nahin deta

jidhar insaniyat hai ye udhar hone nahin deta

yaad aa.egā bahut dhuup meñ saayā in kā

apne āñgan meñ hī ye būḌhā shajar rahne do

yaad aaega bahut dhup mein saya in ka

apne aangan mein hi ye buDha shajar rahne do

mire bachchoñ kā ab gustāḳh honā haq ba-jānib hai

jahāñ fāqoñ pe faaqe hoñ kahāñ ādāb aate haiñ

mere bachchon ka ab gustaKH hona haq ba-jaanib hai

jahan faqon pe faqe hon kahan aadab aate hain

aane jaane se hī qaa.em haiñ jahāñ ke rishte

aanā jaanā hai to dīvār meñ dar rahne do

aane jaane se hi qaem hain jahan ke rishte

aana jaana hai to diwar mein dar rahne do

kisī ke haath meñ kaasa kisī ke haath meñ jhāḌū

khilaune haath meñ le kar koī bachcha nahīñ niklā

kisi ke hath mein kasa kisi ke hath mein jhaDu

khilaune hath mein le kar koi bachcha nahin nikla

ġhair ke hāthoñ meñ kyuuñ dete ho apnī pagḌī

baat ghar kī hai to phir baat ko ghar rahne do

ghair ke hathon mein kyun dete ho apni pagDi

baat ghar ki hai to phir baat ko ghar rahne do

laḌkhaḌā.e the ek baar qadam

'umr bhar phir sañbhal nahīñ paa.e

laDkhaDae the ek bar qadam

'umr bhar phir sanbhal nahin pae

mujrim to mire des kā har shaḳhs hai 'aslam'

jo jurm kā iqrār kare koī nahīñ hai

mujrim to mere des ka har shaKHs hai 'aslam'

jo jurm ka iqrar kare koi nahin hai

aise logoñ se ham nahīñ milte

jin kī gardan meñ ḳham nahīñ hotā

aise logon se hum nahin milte

jin ki gardan mein KHam nahin hota

maiñ jab bhī baat kartā huuñ vo mujh ko Tok detā hai

mirā beTā hī mujh ko mo'tabar hone nahīñ detā

main jab bhi baat karta hun wo mujh ko Tok deta hai

mera beTa hi mujh ko mo'tabar hone nahin deta

kis ke haq meñ koī baḳhshish kī du'ā māñgeñ ham

koī martā hī nahīñ shahr meñ īmān ke saath

kis ke haq mein koi baKHshish ki du'a mangen hum

koi marta hi nahin shahr mein iman ke sath

ḳhudā.ī baañT dī tū ne hai jin aadam ke beToñ meñ

ḳhudāyā un meñ terā ek bhī banda nahīñ niklā

KHudai banT di tu ne hai jin aadam ke beTon mein

KHudaya un mein tera ek bhi banda nahin nikla

ubhre hue alfāz to andhoñ ke liye haiñ

mujh ko to hai alfāz kī gahrā.ī meñ jaanā

ubhre hue alfaz to andhon ke liye hain

mujh ko to hai alfaz ki gahrai mein jaana