sab ḳhvāb hamāre sach hote

to niiñd hamārī uḌ jaatī

sab KHwab hamare sach hote

to nind hamari uD jati

shādī ke din mu'āmla gambhīr ho gayā

us ne kahā qubūl magar aañkh maar ke

shadi ke din mu'amla gambhir ho gaya

us ne kaha qubul magar aankh mar ke

rishte vā'de bāteñ yādeñ chhoḌ ke aage aayā huuñ

pīchhe muḌ kar dekhūñgā to patthar kā ban jā.ūñgā

rishte wa'de baaten yaaden chhoD ke aage aaya hun

pichhe muD kar dekhunga to patthar ka ban jaunga

rasman gale to milte haiñ ham 'iid par zarūr

lekin diloñ ke fāsle hote nahīñ haiñ duur

rasman gale to milte hain hum 'id par zarur

lekin dilon ke fasle hote nahin hain dur

kabhī ḳhiffat chhupāne meñ kabhī rishte nibhāne meñ

kabhī andhā kabhī bahrā kabhī gūñgā banā huuñ maiñ

kabhi KHiffat chhupane mein kabhi rishte nibhane mein

kabhi andha kabhi bahra kabhi gunga bana hun main

zarūrī hai ki dil par 'aql pahre-dār ho jaa.e

na jaane kin sharā.it par tirā iqrār ho jaa.e

zaruri hai ki dil par 'aql pahre-dar ho jae

na jaane kin sharait par tera iqrar ho jae

baḌe hī josh se insāf kī zanjīr kheñchī thī

baḌī hī zor se ghanTī girī hai TuuT kar sar par

baDe hi josh se insaf ki zanjir khenchi thi

baDi hi zor se ghanTi giri hai TuT kar sar par

detā jo sard raat meñ kambal ġharīb ko

denā na paḌtā sub.h ko ḳhairāt meñ kafan

deta jo sard raat mein kambal gharib ko

dena na paDta subh ko KHairaat mein kafan

chashma ravāñ huā na koī qāfila rukā

eḌī ragaḌte rah ga.e nā-chār dasht meñ

chashma rawan hua na koi qafila ruka

eDi ragaDte rah gae na-chaar dasht mein