maiñ lauTne ke irāde se jā rahā huuñ magar

safar safar hai mirā intizār mat karnā

main lauTne ke irade se ja raha hun magar

safar safar hai mera intizar mat karna

tumhārī yaad sukūñ kā sabab to hai lekin

tumhārī yaad se tanhā.ī kam nahīñ hotī

tumhaari yaad sukun ka sabab to hai lekin

tumhaari yaad se tanhai kam nahin hoti

bachchoñ kī zid vāpas laa.ī hañsne-hañsāne vāloñ meñ

barsoñ baa'd hue ham shāmil 'iid manāne vāloñ meñ

bachchon ki zid wapas lai hansne-hansane walon mein

barson ba'd hue hum shamil 'id manane walon mein

muflisī meñ kyā manā.ī jaa.eñ ḳhushiyāñ 'iid kī

dil meñ nashtar ban ke chubhtī haiñ sivayyāñ 'iid kī

muflisi mein kya manai jaen KHushiyan 'id ki

dil mein nashtar ban ke chubhti hain siwayyan 'id ki

nayā chehra nayā lahja nayā mazmūn dete haiñ

ġhazal kahte haiñ ham jab bhī ġhazal ko ḳhuun dete haiñ

naya chehra naya lahja naya mazmun dete hain

ghazal kahte hain hum jab bhi ghazal ko KHun dete hain