maiñ rafta rafta tujhe bhūltā hī jaatā huuñ

kisī kī yaad yuuñ parvardigār aatī hai

main rafta rafta tujhe bhulta hi jata hun

kisi ki yaad yun parwardigar aati hai

mauzū'-e-guftugū to hai jinsī jamāliyāt

aur markaz-e-ḳhayāl tumhārā hī jism hai

mauzu'-e-guftugu to hai jinsi jamaliyat

aur markaz-e-KHayal tumhaara hi jism hai

aa.iye shauq se bhauñchāl bapā kar diije

bazm-e-dil aap kī ḳhātir hī sajā rakkhī hai

aaiye shauq se bhaunchaal bapa kar dije

bazm-e-dil aap ki KHatir hi saja rakkhi hai

is vāste muhāl hai ham donoñ meñ nibāh

tū ḳhud-numā hai maiñ bhī riyā ke ḳhilāf huuñ

is waste muhaal hai hum donon mein nibah

tu KHud-numa hai main bhi riya ke KHilaf hun

roz miltā hai bulandī kā nayā ziina mujhe

roz taklīf ka.ī logoñ ko ho jaatī hai

roz milta hai bulandi ka naya zina mujhe

roz taklif kai logon ko ho jati hai

zindagī se milā nahīñ kuchh bhī

phir bhī ik aas hai musalsal hai

zindagi se mila nahin kuchh bhi

phir bhi ek aas hai musalsal hai

dil-e-pākīza meñ yuuñ aa ke Thahar jaate haiñ

in hasīnoñ kā Thikāna ye haram ho jaise

dil-e-pakiza mein yun aa ke Thahar jate hain

in hasinon ka Thikana ye haram ho jaise

lamhoñ ke saaz par tirī dhaḌkan kī lai ho tez

āñkhoñ ke zāviye hoñ ghaḌī kī bisāt par

lamhon ke saz par teri dhaDkan ki lai ho tez

aankhon ke zawiye hon ghaDi ki bisat par

chashm-poshī kareñ muḳhlis haiñ vafā meñ vo agar

kyoñ mire achchhe-bure par vo nazar rakhte haiñ

chashm-poshi karen muKHlis hain wafa mein wo agar

kyon mere achchhe-bure par wo nazar rakhte hain

zindagī kā is qadar pīchhā kiyā

aa gayā huuñ maut kī dīvār tak

zindagi ka is qadar pichha kiya

aa gaya hun maut ki diwar tak

ham chaah ke bhī ek nahīñ ho sake kabhī

āḳhir hamāre biich kī dīvār kaun hai

hum chah ke bhi ek nahin ho sake kabhi

aaKHir hamare bich ki diwar kaun hai

tirī mā'sūm nigāhoñ ke taqaddus ke tufail

'ishq tahzīb se ārāsta ho jaatā hai

teri ma'sum nigahon ke taqaddus ke tufail

'ishq tahzib se aarasta ho jata hai

dil-e-bebāk kā mālik huuñ mujhe ḳhauf nahīñ

hākim-e-vaqt ke hukm-e-rasan-o-zindāñ se

dil-e-bebak ka malik hun mujhe KHauf nahin

hakim-e-waqt ke hukm-e-rasan-o-zindan se