آج کی رات دوالی ہے دیے روشن ہیں

آج کی رات یہ لگتا ہے میں سو سکتا ہوں

زخم جو تم نے دیا وہ اس لیے رکھا ہرا

زندگی میں کیا بچے گا زخم بھر جانے کے بعد

وقت رخصت آب دیدہ آپ کیوں ہیں

جسم سے تو جاں ہماری جا رہی ہے

میں نے اک شہر ہمیشہ کے لیے چھوڑ دیا

لیکن اس شہر کو آنکھوں میں بسا لایا ہوں

یوں بار بار مجھ کو صدائیں نہ دیجئے

اب وہ نہیں رہا ہوں کوئی دوسرا ہوں میں

آنسوؤں سے لکھ رہے ہیں بے بسی کی داستاں

لگ رہا ہے درد کی تصویر بن جائیں گے ہم

سارے دکھ سو جائیں گے لیکن اک ایسا غم بھی ہے

جو مرے بستر پہ صدیوں کا سفر رکھ جائے گا

زندگی میری مجھے قید کئے دیتی ہے

اس کو ڈر ہے میں کسی اور کا ہو سکتا ہوں

عجیب حالت ہے جسم و جاں کی ہزار پہلو بدل رہا ہوں

وہ میرے اندر اتر گیا ہے میں خود سے باہر نکل رہا ہوں

شب کی آغوش میں مہتاب اتارا اس نے

میری آنکھوں میں کوئی خواب اتارا اس نے

یہ جو دیوار اندھیروں نے اٹھا رکھی ہے

میرا مقصد اسی دیوار میں در کرنا ہے

میرے جسم سے وقت نے کپڑے نوچ لئے

منظر منظر خود میری پوشاک ہوا

اگر سائے سے جل جانے کا اتنا خوف تھا تو پھر

سحر ہوتے ہی سورج کی نگہبانی میں آ جاتے

روشنیاں چلی گئیں شام کے اقتدار میں

تیرہ شبی کا اژدہا سارے دیے نگل گیا

اتر ہی جائے گا اک دن خمار گندم کا

یہ کیا کہ ہر گھڑی رفتار جاں کو تکتے رہو

وہ چاند سی ہتھیلیاں وہ روشنی سی انگلیاں

یہ کس نے مجھ کو چھو لیا بجھے چراغ جل گئے

وہی شراب سے خالی گلاس بھرتے ہوئے

میں چڑھ رہا ہوں ابھی سیڑھیاں اترتے ہوئے

میں اس کو ڈھونڈھنے نکلا تو خود کو لے آیا

وہ میری ذات کے اندر کہیں چھپا نکلا

یہ نقلی سجدے یہ دست بوسی یہ جھوٹی عزت تمہیں مبارک

ہم ایک مٹی کے آدمی ہیں مزار ہونے سے ڈر رہے ہیں

سینۂ صبر پہ اک بار الم رہ گیا ہے

ایک پتا ہی سہی شاخ پہ نم رہ گیا ہے

پرندے یادوں کے آتے ہیں لوٹ جاتے ہیں

بدن کی ریت پہ کوئی شجر ضروری ہے