میں تنہائی کو اپنا ہم سفر کیا مان بیٹھا

مجھے لگتا ہے میرے ساتھ دنیا چل رہی ہے

میں چاہتا ہوں کہ تیری طرف نہ دیکھوں میں

مری نظر کو مگر تو نے باندھ رکھا ہے

رات دن گردش میں ہیں لیکن پڑا رہتا ہوں میں

کام کیا میرا یہاں ہے سوچتا رہتا ہوں میں

تجھے روشنی سے جدا کروں کسی شام میں

تجھے اتنی تاب میں دیکھنا نہیں ہو رہا

درخت زرد میں جیسے ہرا سا رہتا ہے

وہ ٹھیک اسی طرح مجھی میں بھرا سا رہتا ہے

میں اپنی یاترا پر جا رہا ہوں

مجھے اب لوٹ کر آنا نہیں ہے

اسے میں دور ہی سے دیکھتا رہا ثانیؔ

جو آج پانی میں اترا ہوں تو کھلا دریا

یقیناً سوچتا ہوگا وہ مجھ کو

اسے میں نے ابھی سوچا نہیں ہے

ترا وجود ترے راستے میں حائل ہے

یہیں سے ہو کے مرا قافلہ گزرتا ہے

روشنی میں لفظ کے تحلیل ہو جانے سے قبل

اک خلا پڑتا ہے جس میں گھومتا رہتا ہوں میں

دیوار و در نے رنگوں سے دامن چھڑا لیا

یک رنگئ سکوت سے کیوں گھر نڈھال ہے

جانے کیسی روشنی تھی کر گئی اندھا مجھے

اس بھیانک تیرگی میں بھی بجھا رہتا ہوں میں

ہو رہا ہوں ترے دکھ میں تحلیل

اپنے ہر درد سے کٹتا جاؤں

میں دن کو شب سے بھلا کیوں الگ کروں ثانی

یہ تیرگی بھی تو اک روشنی کا حصہ ہے

اسی دنیا میں ہے وہ دوسری دنیا ثانیؔ

لوگ جس کے لیے جنگل کی طرف جاتے ہیں

کہاں آپ کو بھی گوارا تھا میں

نہیں جس گھڑی تک تمہارا تھا میں

دیوار خواب میں کوئی در کر نہیں سکے

ہم لوگ شب سے آگے سفر کر نہیں سکے