aae the jagte hue KHwabon mein kho gae

aa.e the jāgte hue ḳhvāboñ meñ kho ga.e

ye apne rāhbar bhī sarāboñ meñ kho ga.e

merī nigāh-e-shauq kā me'yār tum hī the

tum ne ye kyā kiyā ki hijāboñ meñ kho ga.e

jazboñ ko paḌhne vaale to insān tak ga.e

alfāz paḌhne vaale kitāboñ meñ kho ga.e

tūfāñ ko sahne vaale yahāñ surḳh-rū hue

jo kashmakash se haare ḳharāboñ meñ kho ga.e

kyā ḳhuub apnā farz nibhāyā janāb-e-man

'maḳhmūr' ho ke aap sharāboñ meñ kho ga.e

aae the jagte hue KHwabon mein kho gae

ye apne rahbar bhi sarabon mein kho gae

meri nigah-e-shauq ka me'yar tum hi the

tum ne ye kya kiya ki hijabon mein kho gae

jazbon ko paDhne wale to insan tak gae

alfaz paDhne wale kitabon mein kho gae

tufan ko sahne wale yahan surKH-ru hue

jo kashmakash se haare KHarabon mein kho gae

kya KHub apna farz nibhaya janab-e-man

'maKHmur' ho ke aap sharabon mein kho gae