aaj aankhon mein jo KHumari hai

aaj āñkhoñ meñ jo ḳhumārī hai

un ke ḳhvāboñ meñ shab guzārī hai

kaun laayā hai hosh meñ mujh ko

kis nazar ne nazar utārī hai

hijr dekhā hai vasl dekhā hai

donoñ jānib hī be-qarārī hai

phir kitāboñ ke phuul mahke haiñ

phir tirī yaad dil pe taarī hai

dil ke TukḌe hue haiñ siine meñ

jān-e-jāñ choT ye karārī hai

jis ko jān-e-ġhazal batāte ho

vo ġhazal to miyāñ hamārī hai

ham ne kaaTī hai 'umr un ke baġhair

kaun kahtā hai ki guzārī hai

ham vafādār-e-mulk haiñ 'ġhāfil'

bas yahī dāstāñ hamārī hai

aaj aankhon mein jo KHumari hai

un ke KHwabon mein shab guzari hai

kaun laya hai hosh mein mujh ko

kis nazar ne nazar utari hai

hijr dekha hai wasl dekha hai

donon jaanib hi be-qarari hai

phir kitabon ke phul mahke hain

phir teri yaad dil pe tari hai

dil ke TukDe hue hain sine mein

jaan-e-jaan choT ye karari hai

jis ko jaan-e-ghazal batate ho

wo ghazal to miyan hamari hai

hum ne kaTi hai 'umr un ke baghair

kaun kahta hai ki guzari hai

hum wafadar-e-mulk hain 'ghafil'

bas yahi dastan hamari hai