aankhon ko pur-nam hasrat ka darwaza wa rakkha hai

āñkhoñ ko pur-nam hasrat kā darvāza vā rakkhā hai

apne TuuTe ḳhvāb ko ham ne ab tak zinda rakkhā hai

'ishq kiyā to Tuut ke jī bhar nafrat kī to shiddat se

apne har kirdār kā chehra ham ne ujlā rakkhā hai

jo aayā bāzār meñ vo bas jāñch-parakh kar chhoḌ gayā

ham ne ḳhud ko soch-samajh kar thoḌā mahñgā rakkhā hai

thā e'lān kahānī meñ ik roz nadī bhī aa.egī

ham ne is ummīd meñ ab tak ḳhud ko pyāsā rakkhā hai

aksar shīrīñ kī chāhat ne koh-kanī karvā.ī hai

aksar parbat ke siine par ham ne tesha rakkhā hai

ham se bāteñ karne vaale uljhan meñ paḌ jaate haiñ

ham ne apne andar ḳhud ko itnā bikhrā rakkhā hai

tum ne lahja mīThā rakh kar tīkhī bāteñ bolī haiñ

ham ne bāteñ mīThī kī haiñ lahja tīkhā rakkhā hai

duniyā vāloñ ne to puurī koshish kī Thukrāne kī

lekin apnī zid meñ ham ne ḳhud ko manvā rakkhā hai

aankhon ko pur-nam hasrat ka darwaza wa rakkha hai

apne TuTe KHwab ko hum ne ab tak zinda rakkha hai

'ishq kiya to Tut ke ji bhar nafrat ki to shiddat se

apne har kirdar ka chehra hum ne ujla rakkha hai

jo aaya bazar mein wo bas jaanch-parakh kar chhoD gaya

hum ne KHud ko soch-samajh kar thoDa mahnga rakkha hai

tha e'lan kahani mein ek roz nadi bhi aaegi

hum ne is ummid mein ab tak KHud ko pyasa rakkha hai

aksar shirin ki chahat ne koh-kani karwai hai

aksar parbat ke sine par hum ne tesha rakkha hai

hum se baaten karne wale uljhan mein paD jate hain

hum ne apne andar KHud ko itna bikhra rakkha hai

tum ne lahja miTha rakh kar tikhi baaten boli hain

hum ne baaten miThi ki hain lahja tikha rakkha hai

duniya walon ne to puri koshish ki Thukrane ki

lekin apni zid mein hum ne KHud ko manwa rakkha hai