aapko batana hai aap bhul jate hain

aap ko batānā hai aap bhuul jaate haiñ

roz yaad aanā hai aap bhuul jaate haiñ

sāmne vo aa.eñ jab paas baiTh jaa.eñ tab

kitnā muskurānā hai aap bhuul jaate haiñ

laash apne ḳhvāboñ kī raakh shab ke phūloñ kī

sub.h-dam uThānā hai aap bhuul jaate haiñ

dard kī numā.ish se pattharoñ kī bārish se

aa.ina bachānā hai aap bhuul jaate haiñ

ḳhushk hote lafzoñ se sard hote lahje se

aap par nishāna hai aap bhuul jaate haiñ

dhuup ke utarte hī aur charāġh jalte hī

ghar ko lauT aanā hai aap bhuul jaate haiñ

kaun hai rafīq apnā kaun hai harīf apnā

kis ko āzmānā hai aap bhuul jaate haiñ

āñsuoñ kī bārish se aur ġhamoñ kī sāzish se

aap ko bachānā hai aap bhuul jaate haiñ

be-sabab taġhāful se ġhair par 'ināyat se

dil nahīñ jalānā hai aap bhuul jaate haiñ

aap ko pata to hai aap se mohabbat hai

aap se chhupānā hai aap bhuul jaate haiñ

vaqt jab kaThin aa.e aur nazar na kuchh aa.e

hausla baḌhānā hai aap bhuul jaate haiñ

roz roz ye kahnā vaqt hī nahīñ miltā

ye bhī ik bahāna hai aap bhuul jaate haiñ

aap ko batana hai aap bhul jate hain

roz yaad aana hai aap bhul jate hain

samne wo aaen jab pas baiTh jaen tab

kitna muskurana hai aap bhul jate hain

lash apne KHwabon ki rakh shab ke phulon ki

subh-dam uThana hai aap bhul jate hain

dard ki numaish se pattharon ki barish se

aaina bachana hai aap bhul jate hain

KHushk hote lafzon se sard hote lahje se

aap par nishana hai aap bhul jate hain

dhup ke utarte hi aur charagh jalte hi

ghar ko lauT aana hai aap bhul jate hain

kaun hai rafiq apna kaun hai harif apna

kis ko aazmana hai aap bhul jate hain

aansuon ki barish se aur ghamon ki sazish se

aap ko bachana hai aap bhul jate hain

be-sabab taghaful se ghair par 'inayat se

dil nahin jalana hai aap bhul jate hain

aap ko pata to hai aap se mohabbat hai

aap se chhupana hai aap bhul jate hain

waqt jab kaThin aae aur nazar na kuchh aae

hausla baDhana hai aap bhul jate hain

roz roz ye kahna waqt hi nahin milta

ye bhi ek bahana hai aap bhul jate hain