aasmanon ko tah-e-ab nahin kar sakte

āsmānoñ ko tah-e-āb nahīñ kar sakte

sail-e-girya tujhe sailāb nahīñ kar sakte

bujhte jaate haiñ charāġh aaj havā kī zad par

raat ko sīna-e-mahtāb nahīñ kar sakte

aisī vo kaun sī shai hai jo tasavvur meñ nahīñ

aisā kyā hai ki mire ḳhvāb nahīñ kar sakte

muntazir hai to rahe pairahan-e-nikhat-o-nūr

itnī 'ujlat mire asbāb nahīñ kar sakte

lutf-o-rāhat kī havas hai to kisī shahr ko jā

ye karam dasht ke ādāb nahīñ kar sakte

aasmanon ko tah-e-ab nahin kar sakte

sail-e-girya tujhe sailab nahin kar sakte

bujhte jate hain charagh aaj hawa ki zad par

raat ko sina-e-mahtab nahin kar sakte

aisi wo kaun si shai hai jo tasawwur mein nahin

aisa kya hai ki mere KHwab nahin kar sakte

muntazir hai to rahe pairahan-e-nikhat-o-nur

itni 'ujlat mere asbab nahin kar sakte

lutf-o-rahat ki hawas hai to kisi shahr ko ja

ye karam dasht ke aadab nahin kar sakte