ab kyun harim-e-naz mein sarmastiyan nahin

ab kyuuñ harīm-e-nāz meñ sarmastiyāñ nahīñ

ham vo nahīñ ki aap meñ vo shoḳhiyāñ nahīñ

dil hī nahīñ jo soz-e-junūñ se tapāñ nahīñ

kyā zindagī jo vaqf-e-ġham-e-jāvedāñ nahīñ

har-vaqt ab to jaib-o-garebāñ haiñ chaak chaak

ehsās ehtimām-e-bahār-o-ḳhizāñ nahīñ

ajzā-e-hast-o-būd mohabbat meñ kho ga.e

ik vahm hai so us kā bhī koī gumāñ nahīñ

kaunain mere panja-e-vahshat kī zad meñ haiñ

mere junūñ kī qaid makāñ lā-makāñ nahīñ

go ārzū-e-jur.at-e-rindāna hai magar

hāsil ba-qadr zauq ma-e-arġhavāñ nahīñ

maiñ pā.emāl-e-vāda-e-fardā zarūr huuñ

lekin fareb-ḳhurda-e-nāz-e-butāñ nahīñ

ifshā-e-rāz-e-ishq kā azm-e-buland hai

'maz.har' ab aur tāqat-e-zabt-e-fuġhāñ nahīñ

ab kyun harim-e-naz mein sarmastiyan nahin

hum wo nahin ki aap mein wo shoKHiyan nahin

dil hi nahin jo soz-e-junun se tapan nahin

kya zindagi jo waqf-e-gham-e-jawedan nahin

har-waqt ab to jaib-o-gareban hain chaak chaak

ehsas ehtimam-e-bahaar-o-KHizan nahin

ajza-e-hast-o-bud mohabbat mein kho gae

ek wahm hai so us ka bhi koi guman nahin

kaunain mere panja-e-wahshat ki zad mein hain

mere junun ki qaid makan la-makan nahin

go aarzu-e-jurat-e-rindana hai magar

hasil ba-qadr zauq ma-e-arghawan nahin

main paemal-e-wada-e-farda zarur hun

lekin fareb-KHurda-e-naz-e-butan nahin

ifsha-e-raaz-e-ishq ka azm-e-buland hai

'mazhar' ab aur taqat-e-zabt-e-fughan nahin