achchhe-achchhon ko nacha de dil-e-be-tab ki dhun

achchhe-achchhoñ ko nachā de dil-e-be-tāb kī dhun

kaisī pur-soz hai is zarra-e-sīmāb kī dhun

zamzama-ḳhvāñ dil-e-āshufta-navā ke aage

kaun suntā hai tire barbat-o-mizrāb kī dhun

chheḌ kar tār-e-nafas 'ālam-e-vahshat meñ kabhī

mutrib-e-rangīñ-navā sun dil-e-betāb kī dhun

qarya-e-jāñ meñ koī 'aks huā raqs-kunāñ

baj uThī chashm-e-tamannā meñ kisī ḳhvāb kī dhun

is udāsī bhare lahje kī sahar-angezī

goyā sahrā meñ koī chheḌ de mizrāb kī dhun

aañkh lagne nahīñ detā ye sadāoñ kā hujūm

shor kartī hai bahut TuuTe hue ḳhvāb kī dhun

achchhe-achchhon ko nacha de dil-e-be-tab ki dhun

kaisi pur-soz hai is zarra-e-simab ki dhun

zamzama-KHwan dil-e-ashufta-nawa ke aage

kaun sunta hai tere barbat-o-mizrab ki dhun

chheD kar tar-e-nafas 'alam-e-wahshat mein kabhi

mutrib-e-rangin-nawa sun dil-e-betab ki dhun

qarya-e-jaan mein koi 'aks hua raqs-kunan

baj uThi chashm-e-tamanna mein kisi KHwab ki dhun

is udasi bhare lahje ki sahar-angezi

goya sahra mein koi chheD de mizrab ki dhun

aankh lagne nahin deta ye sadaon ka hujum

shor karti hai bahut TuTe hue KHwab ki dhun