agar dimagh se baghi hue nahin hote

agar dimāġh se bāġhī hue nahīñ hote

dil-o-nazar ke hasīñ silsile nahīñ hote

'ajīb baat hai pī kar bhī raushnī kā lahū

mirī zamīn ke paude hare nahīñ hote

agar lahū nahīñ kartā maiñ apne paañv yahāñ

tirī zamīñ pe kahīñ rāste nahīñ hote

ye log 'ijz kī tāsīr se nahīñ vāqif

isī liye to yahāñ mo'jize nahīñ hote

na kar talāsh muqaddar kā āsmāñ in par

hatheliyoñ pe sitāre jaḌe nahīñ hote

ye ird-gird kī maujūdgī to bar-haq hai

magar vo log jo hote hue nahīñ hote

mujhe batā.e sabab koī nā-gahānī kā

bilā-javāz agar hādse nahīñ hote

ham asl shakl bahar-kaif dekhte 'āsim'

fareb-ḳhez agar aa.ine nahīñ hote

agar dimagh se baghi hue nahin hote

dil-o-nazar ke hasin silsile nahin hote

'ajib baat hai pi kar bhi raushni ka lahu

meri zamin ke paude hare nahin hote

agar lahu nahin karta main apne panw yahan

teri zamin pe kahin raste nahin hote

ye log 'ijz ki tasir se nahin waqif

isi liye to yahan mo'jize nahin hote

na kar talash muqaddar ka aasman in par

hatheliyon pe sitare jaDe nahin hote

ye ird-gird ki maujudgi to bar-haq hai

magar wo log jo hote hue nahin hote

mujhe batae sabab koi na-gahani ka

bila-jawaz agar hadse nahin hote

hum asl shakl bahar-kaif dekhte 'asim'

fareb-KHez agar aaine nahin hote