agar mujhko tera sahaara na ho

agar mujh ko terā sahārā na ho

mirā is jahāñ meñ guzārā na ho

vo har baar ye kah ke baḳhshe ḳhatā

magar yaad rakhnā dubāra na ho

na rakh 'ishq meñ fā.ede kī umiid

agar chāhtā hai ḳhasārā na ho

muqaddar bhī us ko harāTā nahīñ

jise haar jaanā gavāra na ho

koī aisā fāteh mujhe bhī dikhā

kabhī zindagī meñ jo haarā na ho

tavajjoh tirī chāhtā huuñ maiñ par

tirā dhyān mujh pe hī saarā na ho

bashar meñ hoñ chāhe hunar laakh hī

par ehsāñ jatāne kā yaarā na ho

ye insāñ mileñge tire dar pe hī

ba-juz tere gar koī chāra na ho

bhañvar dekhtā hai safīne ko yuuñ

samundar kā goyā kinārā na ho

ḳhudārā na tum ko mile aisā shaḳhs

tumhārā jo ho kar tumhārā na ho

mohabbat ho gar to mohabbat ho bas

mohabbat kā phir goshvāra na ho

un āñkhoñ se phir pūchhnā merā haal

jo hiile se gar āshkārā na ho

kahīñ phir davā zahr lagne lage

koī zaḳhm itnā bhī pyārā na ho

agar mujh ko tera sahaara na ho

mera is jahan mein guzara na ho

wo har bar ye kah ke baKHshe KHata

magar yaad rakhna dubara na ho

na rakh 'ishq mein faede ki umid

agar chahta hai KHasara na ho

muqaddar bhi us ko haraTa nahin

jise haar jaana gawara na ho

koi aisa fateh mujhe bhi dikha

kabhi zindagi mein jo haara na ho

tawajjoh teri chahta hun main par

tera dhyan mujh pe hi sara na ho

bashar mein hon chahe hunar lakh hi

par ehsan jatane ka yara na ho

ye insan milenge tere dar pe hi

ba-juz tere gar koi chaara na ho

bhanwar dekhta hai safine ko yun

samundar ka goya kinara na ho

KHudara na tum ko mile aisa shaKHs

tumhaara jo ho kar tumhaara na ho

mohabbat ho gar to mohabbat ho bas

mohabbat ka phir goshwara na ho

un aankhon se phir puchhna mera haal

jo hile se gar aashkara na ho

kahin phir dawa zahr lagne lage

koi zaKHm itna bhi pyara na ho